Umarga Taluka Body Found
उमरगा : उमरगा तालुक्यातील सोलापूर-हैदराबाद राष्ट्रीय महामार्गावरील तलमोड शिवारात वन विभागाच्या तपासणी नाक्याजवळ एका अंदाजे ७५ वर्षीय अनोळखी पुरुषाचा मृतदेह आढळून आल्याने परिसरात खळबळ उडाली. ही घटना शनिवारी (दि. ११) दुपारी सुमारे १ ते १.३० वाजण्याच्या दरम्यान उघडकीस आली.
पोलिसांकडून मिळालेल्या माहितीनुसार, तलमोड शिवारातील वन विभागाच्या चेकपोस्टलगत जाणाऱ्या कच्च्या रस्त्याच्या बाजूला वडाच्या झाडाखाली गुलाबी रंगाच्या चटईवर एका वृद्धाचा मृतदेह असल्याची माहिती पोलिसांना मिळाली. माहिती मिळताच पोलीस निरीक्षक प्रल्हाद सूर्यवंशी, पोलीस उपनिरीक्षक वाजिद शेख, चैतन्य कोनगुलवार, पोलीस शिपाई श्रीहरी फुगटे यांच्यासह पोलिसांच्या पथकाने घटनास्थळी धाव घेऊन पंचनामा केला.
पोलिसांनी परिसराची कसून पाहणी करून मृत व्यक्तीची ओळख पटविण्याचा प्रयत्न केला. मात्र, वृत्त लिहिपर्यंत त्याची ओळख पटलेली नव्हती.
मृत व्यक्तीचे अंदाजे वय ७५ वर्षे असून, मध्यम बांधा, उंची सुमारे १६८ सेंटीमीटर, उभट चेहरा, सावळा वर्ण, पांढरी दाढी अशी त्याची शारीरिक वैशिष्ट्ये आहेत. अंगात पांढऱ्या रंगाचा नेहरू शर्ट व पायजमा, पायात नवीन चप्पल असून मृतदेहाशेजारी नवीन ब्लँकेट आढळून आले.
मृतदेह उत्तरीय तपासणीसाठी उमरगा उपजिल्हा रुग्णालयात पाठविण्यात आला असून, त्यानंतर तो शवागारात ठेवण्यात आला आहे. पुढील तपास पोलीस उपनिरीक्षक वाजिद शेख करीत आहेत.