The school bus inspection campaign was called off after just one day.
छत्रपती संभाजीनगर, पुढारी वृत्त-सेवा : विनापरवाना स्कूलबस तसेच विनाफिटनेस स्कूलबसमधून विद्यार्थ्यांची वाहतूक करत असलेल्या स्कूलबस चालकांविरुद्ध आरटीओच्या अधिकाऱ्यांनी गुरुवारी (दि.१८) तपासणी मोहीम हाती घेतली. ही मोहीम सुरूच राहणार असल्याचे सांगत असतानाच शुक्रवारी (दि.१९) ही मोहीम गुंडाळण्यात आली. अधिकारी निवडणूक कामांत गुंतल्याने ही मोहीम तूर्तास थांबवण्यात आल्याची माहिती प्रादेशिक परिवहन अधिकारी विजय काठोळे यांनी दिली.
स्कूलबस प्रकरणी आलेल्या तक्रारीची गंभीर दखल घेत आरटीओ कार्यालयाने वायुवेग पथकाला कारवाईच्या सुचना दिल्या होत्या. या सुचनेनुसार गुरुवारपासून तपासणी मोहीम हाती घेतली आहे. यात फिटनेस प्रमाणपत्र नसणे, क्षमतेपेक्षा अधिक विद्यार्थी बसवणे, अग्निशमन यंत्रणा व आपत्कालीन दरवाजांची अनुपलब्धता, तसेच चालकांकडे आवश्यक परवाने नसणे आदींप्रकरणी तपासणी करून अपूर्ण कागदपत्रे असणाऱ्या स्कूलबसवर कारवाईचा बडगा उगारला होता.
पहिल्याच दिवशी १२ स्कूलबसवर जप्तीची कारवाई करण्यात आल्याने स्कूलबस चालकांत चांगलीच धांदल उडाली होती. दरम्यान शक्रवारपासून ही कारवाई गुंडाळण्यात आली.
चालकांनी धावपळ थांबवली
कारवाईच्या भीतीने सर्वच स्कूलबस चालकांनी कागदपत्रे अपडेट करण्यासाठी धावपळ सुरू केली होती. दरम्यान, आरटीओचे अधिकारी मनपाच्या निवडणुकीत गुंतल्याने ही मोहीम गुंडाळण्यात आल्याची माहिती मिळताच स्कूलबस चालकांनी धावपळ थांबवून सुटकेचा निश्वास सोडला आहे