Shahaganj encroachment case heats up: Municipal Commissioner informs that the process of action is underway
छत्रपती संभाजीनगर, पुढारी वृत्तसेवा :
शहागंज परिसरातील अतिक्रमण हटविण्याच्या कारवाईदरम्यान अडथळा आणल्याच्या प्रकरणात एमआयएमच्या १४ नगरसेवकांवर मनपा कायद्यानुसार पद रद्द करण्याची प्रक्रिया सुरू असल्याची माहिती महापालिका आयुक्त जी. श्रीकांत यांनी गुरुवारी (दि.५) पत्रकारांशी बोलताना दिली. या प्रकरणात नगरसेवकांसह त्यांच्या नातेवाईक व कार्यकर्त्यांवर गुन्हा दाखल करण्यात आला असून, तपास प्रक्रिया सुरू असल्याचे त्यांनी स्पष्ट केले.
यावेळी आयुक्त जी. श्रीकांत यांनी सांगितले की, महाराष्ट्र महानगरपालिका अधिनियमातील कलम १०-अ नुसार नगर- सेवक शपथपत्रात कायद्याचे पालन करण्याची जबाबदारी स्वीकारतात. कायद्याचे उल्लंघन झाल्यास पदमुक्त होण्याची तरतूद आहे.
त्यानुसार शहागंज येथील अतिक्रमण कारवाईदरम्यान काही नगरसेवक व त्यांच्या कार्यकर्त्यांनी अडथळा आणल्याची नोंद झाल्याने कलम १०, ११ आणि १२ अंतर्गत सुमारे ४० जणांवर गुन्हे दाखल करण्यात आले आहेत.
यामध्ये नगरसेवकांसह त्यांचे भाऊ, पुत्र आणि इतर नातेवाइकांचा समावेश असल्याची माहिती देत पोलिसांकडून व्हिडिओ पुराव्यांच्या आधारे तपास सुरू असल्याचे आयुक्तांनी सांगितले. दरम्यान, विरोधी पक्षनेते समीर साजेद यांनी हा गुन्हा बनावट असल्याचा आरोप केला. तसेच शिंदे सेनेच्या दवावाखाली हा गुन्हा दाखल करण्यात आल्याचा दावाही समीर साजेद यांनी केला.
शहागंज घटनेपूर्वी आपण आयुक्तांशी चर्चा करूनच तेथे गेलो होतो, मात्र त्या वेळी अतिक्रमण कारवाई सुरू नव्हती, असेही त्यांनी स्पष्ट केले. या प्रकरणामुळे शहरातील राजकीय वातावरण चांगलेच तापले असून, पुढील निर्णयाकडे सर्वांचे लक्ष लागले आहे.
...तर मी राजकारणातून संन्यास घेईन
शहागंज येथील हातगाडी कारवाईवेळी अधिकाऱ्याला जिवे मारण्याची धमकी दिल्याचा आरोप विरोधी पक्षनेता समीर साजेद यांनी फेटाळून लावला आहे. तसेच यावर जर असा व्हिडिओ दाखवला तर मी राजकारणातून संन्यास घेईन, असे आव्हानही साजेद यांनी दिले आहे.