Poor road work by contractors doing substandard work in five-star Shendra MIDC, lights also off
राहुल जांगडे
छत्रपती संभाजीनगर : पंचतारांकित शेंद्रा एमआयडीसीत निकृष्ट कामे करणाऱ्या ठेकेदारांकडून कागदी घोडे नाचवण्याचा कारभार सुरू आहे. प्रशासनानेही अगदी त्याच पद्धतीने निकृष्ट कामांना ए.सी. कार्यालयात बसून ओके प्रमाणपत्र देत बिलेही काढली आहेत. मात्र यातील नवीन रस्ते काही महिन्यांतच उखडली आणि पथदिवेही बंद पडली आहेत. ठेकेदारांच्या बहुतांश कामांची अशी बोगसगिरी उघड होऊनही थेट कारवाईऐवजी एमआयडीसी फक्त नोटीसचा खेळ करत असल्याने उद्योगनगरीची वाताहत आणि विकासाची ऐसीतैसी झाल्याचे दिसून येत आहे.
येथील शेंद्रा एमआयडीसीमधील कोट्यवधींच्या निधीतील रस्ते निकृष्ट कामांमुळे काही महिन्यांतच उखडून गेली आहेत. या औद्यागिक वसाहतीमधील एओपीक्यूआर या रस्त्याचे तब्बल ८ कोटी ६७ लाख ९४ हजारांच्या निधीतून गतवर्षी रुंदीकरण आणि मजबुतीकरण केले, तर डी ब्लॉकमधील रस्त्याचे तब्बल ५ कोटी १३ लाख १६ हजार ०७ रुपयांच्या निधीतून मे. मापारी इन्फो. यांनी डांबरीकरण केले होते. मात्र काही महिन्यांतच या रस्त्यांची वाताहत होऊन ठिकठिकाणी मोठमोठी खड्डे पडली.
निकृष्ट कामांमुळे यासह एमआयडीसीतील बहुतांश रस्त्यांचा अक्षरशः धुराडा झाल्याचे दै. पुढारीने समोर आणले. त्याची दखल घेत प्रशासनाने संबंधित ठेकेदाराला नोटीस बजावल्याने एओपीक्यूआर रस्त्याच्या दुरुस्तीचे काम करण्यात आले. मात्र डी ब्लॉकमधील रस्त्याच्या दुरुस्तीचे काम एक दिवस करून तसेच अर्धवट सोडले आहे. एमआयडीसीकडून संपर्क करूनही ठेकेदार प्रतिसाद देत नसल्याने हतबल अधिकाऱ्यांकडून परत एकदा नोटीस बजावण्याची तयारी सुरू आहे.
बिले काढण्याची तत्परता
उद्योगनगरीत कंत्राटदारांनी केलेल्या बोगस कामांचा दर्जा, तपासणी न करता काही महिन्यांतच बिलेही काढण्यात आल्याची माहिती सूत्रांनी दिली आहे. केवळ अनामत रक्कम निविदेतील मुदतीपर्यंत एमआयडीसीकडे डिपॉझिट राहते. तेही डेडलाईन संपताच ठेकेदारांच्या खात्यात वर्ग केली जाते. त्यामुळे निकृष्ट कामांवर कुठलाही अकुंश राहिलेला नाही.
काय आहे कारवाईची पद्धत आणि नियम
टेंडरमधील तरतुदीनंतर रस्ता खराब झाल्यास ठेकेदाराला नोटीस बजावणे.
त्या ठेकेदाराकडून खराब रस्त्याचे काम (खड्डे बुजवणे, पॅचवर्क) करून घेणे.
▶ दुरुस्तीचे काम न ऐकल्यास ठेकेदाराला ब्लॅक लिस्ट करणे.
▶▶प्रशासनाकडे ठेकेदाराने ठेवलेल्या डिपॉझिटमधून ते काम करून घेणे.
शेवटी ठेकेदाराला काळ्या यादीत टाकण्याची कठोर कारवाई करणे.
ठेकेदारांना दुरुस्तीची वारंवार संधी
निकृष्ट कामे करा, नोटीस आली तर पुन्हा तशी दर्जाहीन कामेही करा. थेट दंडात्मक अथवा कठोर कारवाई ऐवजी वारंवार दुरुस्तीची संधी दिली जात असल्याने ठेकेदारही निर्वावले आहे. पुन्हा पुन्हा दर्जाहीन आणि निकृष्ट कामांमुळे औद्योगिकनगरीची दयनीय दुरवस्था झाली आहे.
पथदिव्यांच्या दुरुस्तीतही अंधार
एमआयडीसीतील पथदिव्यांच्या दुरुस्तीसाठी दरवर्षी लाखोंचे कंत्राट देऊनही नुसतेच कागदोपत्री दिवे लावले जाते. आधीच्या असंसो लाईटसनेही तेच केले आणि आताच्या बिटा इलेक्ट्रिकलकडूनही तसाच खेळ सुरू असल्याने उद्योजकांकडून संताप व्यक्त होत आहे.