Merchant Attacked in Ajanta Ghat
अजिंठा, पुढारी वृत्तसेवा अजिंठा घाटात भरदिवसा एका व्यापाऱ्याला अडवून मारहाण करत २ लाख ७० हजार रुपये लुटले. ही घटना रविवारी (दि.३) दुपारी ३.३० वाजण्याच्या सुमारास घडली. या घटनेमुळे परिसरात खळबळ उडाली आहे.
जळगाव जिल्ह्यातील पाचोरा येथून एका जिनिंगमधून २ लाख ७० हजार रुपये घेऊन दुचाकीवरून अजिंठ्याकडे येत असताना घाटातील दर्याजवळ मागून दुचाकीवर आलेल्या दोन अज्ञात व्यक्तींनी व्यापारी शेख युसूफ शेख लुकमान (५०, रा. स्नेहनगर, सिल्लोड) यांना अडवले. त्यानंतर आरोपींनी शेख युसूफ यांना मारहाण करून गंभीर जखमी केले.
हल्लेखोरांनी व्यापाऱ्याकडील २ लाख ७० हजार रुपयांची रक्कम हिसकावून घेतली व त्यांचा मोबाईलही फोडून टाकला. गंभीर जखमी अवस्थेत शेख युसूफ शेख लुकमान यांनी दुचाकीवरून अजिंठा पोलिस ठाणे गाठून घटनेची माहिती दिली. पोलिसांनी तात्काळ त्यांना अजिंठा ग्रामीण रुग्णालयात दाखल केले. प्राथमिक उपचारानंतर पुढील उपचारासाठी नातेवाइकांनी त्यांना सिल्लोड येथील एका खासगी रुग्णालयात हलविले.
या प्रकरणी अजिंठा पोलिस ठाण्यात गुन्हा दाखल करण्याची प्रक्रिया सुरू असल्याची माहिती पोलिसांकडून देण्यात आली आहे.