Gold chain weighing two-and-a-half tolas snatched from elderly woman during morning walk
छत्रपती संभाजीनगर, पुढारी वृत्तसेवा : शहरात साखळीचोरांचा सुळसुळाट पुन्हा एकदा वाढला असून, सिडकोत मॉर्निंग वॉकला गेलेल्या एका ६५ वर्षीय वृद्ध महिलेला दुचाकीस्वार लुटारूंनी लक्ष्य करत गळ्यातील तब्बल अडीच तोळ्यांची सोनसाखळी हिसकावून पोबारा केला. ही घटना सोमवारी (दि.५) सकाळी ६:४५ वाजेच्या सुमारास गुरुकृपा फरसाण मार्ट समोरील रस्त्यावर घडली. याप्रकरणी सिडको पोलिस ठाण्यात गुन्हा दाखल करण्यात आला आहे.
फिर्यादी शोभा पुनमचंद तोतला (६५, रा. आविष्कार कॉलनी) यांच्या तक्रारीनुसार, शोभा या नेहमीप्रमाणे सोमवारी सकाळी पावणेसात ते सात वाजेच्या सुमारास मॉर्निंग वॉक आटोपून घरी परतत होत्या. त्या सिडको एन-६ परिसरातील गुरुकृपा फरसाण मार्टसमोरील रस्त्यावरून पायी जात होत्या. रस्ता मोकळा असताना अचानक त्यांच्या समोरून एका दुचाकीवर दोन तरुण आले.
या दुचाकीवर मागे बसलेल्या तरुणाने पिवळ्या रंगाचे जॅकेट परिधान केले होते. काही कळायच्या आतच या पिवळे जॅकेट घातलेल्या तरुणाने चालत्या गाडीवरून तोतला यांच्या जवळ येत त्यांच्या गळ्यातील सोन्याची साखळी आणि पेंडंट बळजबरीने हिसकावले. आरडाओरड करेपर्यंत चोरट्यांनी दुचाकीवरून सुसाट पळ काढला.
या भयानक प्रकारामुळे शोभा तोतला यांना मोठा मानसिक धक्का बसला आणि त्यांची प्रकृती बिघडली. या धक्क्यातून सावरल्यानंतर त्यांनी सिडको ठाणे गाठून तक्रार दिली. या प्रकरणाचा पुढील तपास उपनिरीक्षक अनिल नाणेकर करत आहेत.