Criminal cases will be filed for encroaching upon government land
छत्रपती संभाजीनगर, पुढारी वृत्तसेवा : जिल्ह्यात मोठ्याप्रमाणात सरकारी वर्ग २ च्या जमिनी बळकावून त्या परस्पर विक्री करण्यात आल्या आहेत. यात प्रामुख्याने गायरानसह खिदमतमासचा समावेश आहे. या प्रकरणांमध्ये आता सरकारची फसवणूक करणाऱ्यांविरोधात थेट फौजदारी गुन्हे दाखल करण्याचा इशारा विभागीय आयुक्त जी. श्रीकांत यांनी बुधवारी (दि. १४) पत्रकारांशी बोलताना दिला.
विभागीय आयुक्तालयासमोरील गट नंबर ३४ मधील जागा सरकारी वर्ग २ ची जमीन असल्याची माहिती विभागीय आयुक्त जी. श्रीकांत यांना मिळाली. त्यानंतर त्यांनी या जागेसह आयुक्तालयालगतच्या सर्वच जागांचा १९५५ सालापासूनचे रेकॉर्ड तपासण्याचे आदेश जिल्हा प्रशासनाला दिले. त्यासाठी एसआयटी नियुक्त केली. या एसआयटीला गट नंबर ३४ बाबत बहुतांश माहिती प्राप्त झाली आहे.
एवढेच नव्हे तर महत्त्वाचे रेकॉर्ड देखील यात गहाळ झाल्याची माहिती प्राप्त झाली आहे. दरम्यान, विभागीय आयुक्त श्रीकांत यांनी मंगळवारी या जागेबाबत आढावा बैठक घेतली. सरकारी जमिनी बळकावून त्या विक्री करणाऱ्यांवर थेट फौजदारी गुन्हे दाखल करण्याचा इशारा विभागीय आयुक्त जी. श्रीकांत यांनी बुधवारी दिला आहे. खिदमतमास जमिन प्रकरणात सर्वाधिक गैरव्यवहार झाल्याच्या तक्रारी आहेत.
काही ठिकाणी सातबाऱ्यामध्ये हेराफेर केल्याची बाबी समोर येत आहेत. त्यावर प्रशासन माहिती संकलन करीत आहे. विभागीय आयुक्तालयालगतच्या व समोरील जागेचा रेकॉर्ड जिल्हा प्रशासन आणि जिल्हा परिषदेकडून मागविला आहे. दिल्ली गेट परिसरातील गटनं. ३४ मधील जागेच्या मालकीबाबत पूर्ण माहिती मागविली आहे, असेही आयुक्तांनी स्पष्ट केले.