'Combing operation' in the jurisdictions of four police stations where crime is rampant
छत्रपती संभाजीनगर, पुढारी वृत्तसेवा : शहरातील कायदा व सुव्यवस्था अबाधित राखण्यासाठी आणि अवैध धंद्यांचे समूळ उच्चाटन करण्यासाठी पोलिस आयुक्त प्रवीण पवार यांच्या आदेशाने सिडको, एम. सिडको, मुकुंदवाडी आणि पुंडलिकनगर पोलिस ठाण्याच्या हद्दीत ३ आणि ४ जुलै रोजी रात्रीच्या सुमारास 'कोंबिंग ऑपरेशन' राबवण्यात आले.
अवैध वाळू वाहतूक व दारू विक्री करणाऱ्यांविरुद्ध गुन्हे दाखल करण्यात आले असून, एकूण १७ लाख ४५ हजार ७४० रुपयांचा मुद्देमाल जप्त करण्यात आला आहे. तसेच ५ फरार आरोपींना अटक केल्याची माहिती गुन्हे शाखेचे निरीक्षक गजानन कल्याणकर यांनी सोमवारी (दि.६) दिली.
सिडको आणि एम. सिडको हद्दीत झाडाझडती
३ जुलै रोजी रात्री ७ ते ११ या वेळेत सिडको आणि एम. सिडको हद्दीत २ पोलिस निरीक्षक, २१ अधिकारी आणि १५५ अंमलदारांच्या मोठ्या फौजफाट्यासह धडक कारवाई करण्यात आली. अवैध दारू विक्री व वाहतूक करणारे राजू घोरपडे, अमोल सुतार, राजू बदाने, अनिरुद्ध जाधव, चरणसिंग राजपूत, परमेश्वर पांडे, नितीन शिंदे आणि रितेश थोरात यांच्यावर एकूण ६ गुन्हे दाखल करून ९ हजार १०० रुपयांचा मुद्देमाल जप्त करण्यात आला.
या कारवाईत १४ सराईत गुन्हेगारांची झाडाझडती घेण्यात आली आणि २ फरार आरोपींना अटक करण्यात आली. ४ ठिकाणी नाकाबंदी करून १९४ वाहने तपासण्यात आली व ५८ वाहनांवर कारवाई करत ६५ हजार ७५० रुपयांचा दंड वसूल करण्यात आला.
मुकुंदवाडी व पुंडलिकनगरमध्ये १७.३० लाखांची वाळू जप्त
दुसऱ्या दिवशी, ४ जुलै रोजी मुकुंदवाडी आणि पुंडलिकनगर परिसरात कोंबिंग ऑपरेशन राबवले. यात अवैध वाळू उपसा व वाहतूक करणाऱ्यांविरुद्ध कारवाईचा बडगा उगारत तब्बल १७ लाख ३० हजार रुपयांचा मुद्देमाल जप्त करण्यात आला. अवैध दारू विक्रेते सचिन शिंदे, श्रीराम गायकवाड, गोविंदा पिंपळे आणि पंढरी आघाव यांच्यावर ५ गुन्हे दाखल करत ६ हजार ६४० रुपयांचा माल जप्त करण्यात आला. पोलिसांनी १८ सराईत गुन्हेगारांची तपासणी केली, ५ हॉटेल्सची झाडाझडती घेतली आणि ३ फरार आरोपींना अटक केली. नाकाबंदीत २०० वाहनांची तपासणी करून ७६ वाहनांवर ६१ हजार २०० रुपयांचा दंड ठोठावण्यात आला.
सराईत गुन्हेगारांची झाडाझडती : ३२
अटक केलेले फरार आरोपी : ०५
अवैध दारू व वाळू कारवाई :
१७ लाख ४५ हजार ७४० रुपयांचा मुद्देमाल जप्त.
वाहतूक कारवाई : ३९४ वाहनांची तपासणी; १३४ वाहनांवर १ लाख २६ हजार २५० रुपयांचा दंड.
वॉरंट व समन्स : ४ अजामीनपात्र, ९ जामीनपात्र वॉरंट आणि ३१ समन्सची बजावणी.