Manoj Jarange Patil Health Update
पाटोदा, पुढारी वृत्तसेवा: मनोज जरांगे पाटील हे मुंबईकडे जात असताना मंगळवारी रात्री पाटोदा येथे मुक्काम नियोजित करण्यात आला होता. त्याप्रमाणे रात्री सभा झाल्यानंतर मुक्काम देखील करण्यात आला; परंतु सकाळी मनोज जरांगे पाटील यांची प्रकृती खालावल्याने पाटोदा या ठिकाणीच त्यांच्यावर सध्या उपचार केले जात आहेत. डॉक्टरांनी त्यांना रुग्णालयात दाखल करण्याचा सल्ला दिला आहे.
मनोज जरांगे पाटील यांनी मराठा आरक्षणाच्या प्रश्नावर २९ ऑगस्टपासून उपोषण सुरू केले आहे. या दरम्यान त्यांनी मुंबईला जाणार असल्याचे जाहीर केले होते. नियोजित दौऱ्याप्रमाणे जरांगे पाटील हे मंगळवारी अंतरवाली सराटी येथून मुंबईकडे निघाले होते. गेवराई व बीडमध्ये त्यांचे स्वागत झाल्यानंतर पाटोदा येथे रात्री दोन वाजता जाहीर सभा पार पडली.
या सभेदरम्यानच त्यांनी आपल्या प्रकृतीच्या तक्रारीविषयी जाहीररीत्या भाष्य केले होते. "माझ्या पोटात आग पडल्यासारखे झाले आहे. ही आग कमी झाली तरच मी पुढे जाऊ शकेन, अन्यथा मला जाणे शक्य होणार नाही. दौऱ्यापेक्षा आरक्षण महत्त्वाचे आहे," असे त्यांनी म्हटले होते.
रात्री मुक्काम केल्यानंतर सकाळी त्यांची प्रकृती आणखीनच खालावल्याने डॉक्टरांनी तपासणी केली असता तातडीच्या उपचाराची गरज व्यक्त केली. यानंतर नारायणगडाचे महंत शिवाजी महाराज व श्री बंकट स्वामी संस्थानाचे महंत लक्ष्मण महाराज मेंगडे हे पाटोदा येथे दाखल झाले. त्यांनी मनोज जरांगे पाटील यांना उपचार घेण्याविषयी विनंती केल्यानंतर जरांगे पाटील यांनी उपचार घेण्यास तयारी दर्शवली. त्यानुसार जरांगे पाटील यांच्यावर उपचार करण्यात येत असून सकाळपासून चार सलाईन देण्यात आल्या आहेत. अजून तासाभराने मनोज जरांगे पाटील यांच्या प्रकृतीबाबतचे अपडेट्स कळू शकणार असून, त्यानंतरच मनोज जरांगे पाटील हे पुढील दौरा नियोजित वेळापत्रकाप्रमाणे करणार की रुग्णालयात दाखल होणार हे देखील कळू शकणार आहे.
मनोज जरांगे पाटील हे मुंबईकडे जात असताना त्यांच्यासोबत जाण्यासाठी हजारो मराठा समाजबांधव निघालेले आहेत. आज नियोजित वेळेप्रमाणे जरांगे पाटील हे श्रीगोंदा येथे मुक्काम करणार होते, परंतु पाटोदा येथेच उपचार घेण्याची वेळ आल्याने आता त्यांच्यासोबतचे आंदोलक देखील पाटोदा मुक्कामी थांबले आहेत.
मनोज जरांगे पाटील हे पाटोदा येथून बुधवारी सकाळी श्रीगोंदा येथे जाणार होते, परंतु बुधवारी दिवसभर त्यांच्यावर पाटोदा येथेच उपचार सुरू असल्याने या ठिकाणचा पोलीस बंदोबस्त वाढवण्यात आला आहे.