केज : केज तालुक्यातील माळेगाव येथे महिलेला धारदार शस्राचा धाक दाखवून दरोडा टाकल्याची घटना समोर आली आहे. महिलेच्या गळ्यातील सोने आणि रोकडसह सोन्याचे दागिने असा एकूण ४ लाख ४४ हजार रुपयांचा ऐवज चोरून नेला. ही घटना गुरूवारी (दि.२२) मध्यरात्री ३.३० च्या सुमारास घडली. याप्रकरणी युसुफवडगाव पोलिस ठाण्यात गुन्हा दाखल करण्यात आला.
केज तालुक्यातील माळेगांव येथील आण्णा कोंडीराम चाळक यांच्या घरी गुरूवारी मध्यरात्री दरोडेखोरांनी सशस्त्र दरोडा टाकला. यावेळी चाळक यांच्यासह त्यांच्या पत्नीला धारदार शस्राचा धाक दाखवून पत्नीच्या गळ्यातील दागिने व कपाट फोडून ४ लाख ४४ हजाराचा ऐवज चोरून नेला. या घटनेमुळे परिसरात भीतीचे वातावरण तयार झाले आहे. याप्रकरणी युसुफवडगाव पोलिस ठाण्यात अज्ञात दरोडेखोराविरुद्धात गुन्हा दाखल करण्यात आला असून प्रभारी अधिकारी सहाय्यक पोलिस निरीक्षक मच्छिंद्रनाथ शेंडगे हे तपास करीत आहेत.