कोल्हापूर : ध्वनी मर्यादेचे उल्लंघन करून मिरवणूक रेंगाळणाऱ्या ट्रॅक्टर मालकास न्यायदंडाधिकारी पंकजा राजपूत यांनी दोषी ठरवत १ वर्षे कारावास व ३० हजार रुपये दंडाची शिक्षा सुनावली. अजित बाजीराव पाटील (रा. ननुंद्रे, ता. पन्हाळा) असे त्याचे नाव आहे. राजारामपुरीत २०१६ मध्ये गणेश तरुण मंडळाच्या मिरवणुकीत ही घटना घडली होती. यापूर्वी राजवाडा पोलिस ठाण्यात दाखल गुन्ह्यात मंडळाच्या अध्यक्षासह पदाधिकाऱ्यांनाही शिक्षा झाली आहे. (Ganesh Visarjan Miravnuk 2016)
राजारामपुरी येथील गणेश तरुण मंडळाने २०१६ मध्ये मिरजकर तिकटी, बिनखांबी गणेश मंदिर, महाद्वार रोडमार्गे मिरवणुकीचे आयोजन केले होते. त्यांच्या साऊंडचे नमुने घेतले असता मर्यादेपेक्षा अधिक आवाज असल्याचे आढळून आले होते. तसेच मिरवणूकही बराच काळ रेंगाळत ठेवली होती.
याप्रकरणी ध्वनी प्रदूषण नियमन व नियंत्रण नियम २००० चे कल ३ (१), ४(१), पर्यावरण संरक्षण अधिनियम १९८६ चे कलम ६ व १५, भादंविस कलम १८८ प्रमाणे मंडळाचा अध्यक्ष, उपाध्यक्ष, खजानीस, सचिव यांच्यासह ट्रॅक्टर मालक- चालकावर गुन्हा दाखल झाला होता.
सरकारी वकील सायली ठोकळ यांनी केलेल्या युक्तिवादावरून पदाधिकाऱ्यांना दोषी ठरवले होते. बुधवारी ट्रॅक्टर मालक अजित पाटील यालाही दोषी ठरवले. जुना राजवाडा पोलिसांनी त्याला ताब्यात घेतले. पोलिस निरीक्षक किरण लोंढे, कोर्ट पैरवी अंमलदार विशाल तळेकर, अंकुश पाटील, हवालदार धोंडिराम शिंदे यांनी सरकारी पक्षाला सहकार्य केले.