Kolhapur Teacher Training
कोल्हापूर : वरिष्ठ, निवड श्रेणी प्रशिक्षणात शिक्षकांची आता परीक्षा घेतली जाणार आहे. या परीक्षेत 50 टक्क्यांपेक्षा अधिक गुण न मिळाल्यास पुन्हा प्रशिक्षण द्यावे लागणार आहे.
सलग सेवेची एकाच वेतन श्रेणीत 12 वर्षे व 24 वर्षे पूर्ण झाल्यानंतर शिक्षकांना सेवाअंतर्गत प्रशिक्षण पूर्ण केल्यानंतर वरिष्ठ व निवड श्रेणीचा लाभ मिळतो. जिल्हा शिक्षण व प्रशिक्षण संस्था यांच्या मार्फत 21 दिवसांचे नि:शुल्क, तर कोरोना आजाराच्या पार्श्वभूमीवर राज्यस्तरावर हे ऑनलाईन स:शुल्क पद्धतीने प्रशिक्षण आयोजित करण्यात येत होते.
राज्य शैक्षणिक संशोधन प्रशिक्षण संस्था पुणे यांच्या वतीने यावर्षीपासून हे प्रशिक्षण पुन्हा ऑफलाईन पद्धतीने घेण्यात येणार आहे. प्रशिक्षणादरम्यान सहभागी शिक्षकांची 300 गुणांची परीक्षा घेतली जाणार आहे. यात किमान 50 टक्के गुण प्राप्त करणे आवश्यक असणार आहे. हे गुण प्राप्त न झाल्यास प्रशिक्षणार्थींना पुढील प्रशिक्षणात पुन्हा नव्याने शुल्क भरून प्रशिक्षण पूर्ण करणे आवश्यक असणार आहे. प्रशिक्षणादरम्यान प्रत्येक तासिकेनंतर 10 गुणांची ऑनलाईन परीक्षा घेण्यात येणार आहे. ऑनलाईन परीक्षा निर्धारित वेळेत पूर्ण करणे आवश्यक आहे. ती वेळेत पूर्ण न केल्यास प्रशिक्षणास गैरहजेरी लागून प्रशिक्षण रद्द होऊ शकते.
प्रशिक्षण पूर्ण केल्यानंतर 40 दिवसांपर्यंत पाच स्वाध्याय व नवोपक्रम कृती संशोधन प्रकल्प पूर्ण करून देणे बंधनकारक आहे. पहिली ते सातवी, आठवी ते दहावी, अकरावी ते बारावी तसेच अध्यापक विद्यालय व कला व क्रीडा शिक्षक अशा चार गटांत प्रशिक्षण होणार आहे.
डॉ. राजेंद्र भोई, प्राचार्य, ‘डाएट’शिक्षणातील नवसंकल्पना व नवीन शैक्षणिक धोरणानुसार झालेले बदल यांची माहिती शिक्षकांना होण्यासाठी व त्यांची अंमलबजावणी शाळा स्तरावर करण्यासाठी अशा प्रकारच्या प्रशिक्षणाची गरज आहे. निश्चितच अशा प्रकारच्या प्रशिक्षणामुळे विद्यार्थ्यांची गुणवत्ता वाढण्यास मदत होणार आहे.