Dainik Pudhari Paypeet Campaign | ‘पायपीट’ उपक्रमातून दुर्गम भागातील विद्यार्थ्यांच्या जिद्दीला नवी प्रेरणा; ‘दैनिक पुढारी’चा स्तुत्य उपक्रम

सुभाष पाटील

विशाळगड : शाहुवाडी तालुक्यातील गजापूर येथील आदर्श माध्यमिक विद्यालयात शैक्षणिक वर्षाच्या पहिल्याच दिवशी विद्यार्थ्यांना एक आगळावेगळा अनुभव मिळाला. ‘दैनिक पुढारी’च्या ‘पायपीट’ या उपक्रमांतर्गत दुर्गम भागांतून डोंगरवाटा ओलांडत शाळेत पोहोचणाऱ्या २५ विद्यार्थ्यांचे अनोख्या पद्धतीने स्वागत करण्यात आले. मान्यवरांच्या हस्ते विद्यार्थ्यांना शालेय साहित्य व शुभेच्छापत्र देऊन त्यांच्या जिद्दीला सलाम करण्यात आला.

या उपक्रमामुळे विद्यार्थ्यांच्या चेहऱ्यावर आनंद झळकला. शिक्षणासाठी प्रतिकूल परिस्थितीतही प्रयत्नशील राहणाऱ्या या मुलांच्या संघर्षाला सन्मान मिळाल्याने त्यांच्यातील आत्मविश्वास व उत्साह दुणावला आहे.

या उपक्रमासाठी गजापूर हायस्कूलची निवड करण्यात आली होती. या शाळेत विशाळगड, मुसलमानवाडी, केंबुर्णेवाडी, दिवाणबाग, बौद्धवाडी व भाततळी या दुर्गम गावांतून २ ते ५ किलोमीटर पायपीट करून विद्यार्थी दररोज शाळेत येतात. या मार्गात घनदाट जंगल व वन्यजीवांचा धोका असूनही, विद्यार्थ्यांचा शिक्षणावरील दृढ विश्वास व न थांबणारी जिद्द याचे चित्र येथे पाहायला मिळते.

‘दैनिक पुढारी’च्या 'पायपीट' उपक्रमाचे वैशिष्ट्य म्हणजे केवळ साहित्य वाटप न करता विद्यार्थ्यांच्या संघर्षाला समाजमान्यतेचा सन्मान दिला जातो.
कार्यक्रमाच्या अध्यक्षस्थानी संस्थापक अध्यक्ष संजयसिंह पाटील होते. त्यांच्यासह माजी उपसरपंच शरद पाटील, ग्रामपंचायत सदस्य मंगेश पाटील, मुख्याध्यापक के. ए. पाटील, शिक्षक व ‘पुढारी’ प्रतिनिधी यांचाही उपक्रमात सहभाग होता.