दोडामार्ग : झोळंबे येथील एका पर्यटन केंद्राच्या परिसरात ‘दुर्मिळ सिसिलियन’ मराठीत ‘देव गांडूळ’ आढळून आला. त्यामुळे या परिसरातील जैवविविधता अधोरेखित झाली आहे.
या परिसरात सापासारखा जीव रविवारी सायंकाळच्या सुमारास ओंकार गावडे आणि गोव्यातील वन्यजीव अभ्यासक विकास कुलकर्णी यांना आढळून आला. प्रथमदर्शनी हा गांडूळ असल्याचे दिसले. परंतु त्याची हालचाल एखाद्या सर्पाप्रमाणे होती. विकास कुलकर्णी यांनी सरीसृप अभ्यासक वरद गिरी यांना फोनवरून सर्व माहिती दिली. हा जीव आपल्या नैसर्गिक अधिवासात असल्याने त्याला त्रास न देता आणि न हाताळता शक्य तेवढी छायाचित्रे घेण्यात आली.
हा उभयचर असून पाणी आणि जमीन अशा दोन्ही ठिकाणी त्याचा अधिवास असतो. याचे मुख्य खाद्य गांडूळ असून त्याला स्पर्श केल्यास शरीर बुळबुळीत लागते. शिकार्या पासून बचावासाठी तो आपल्या शरीरावर चिकट, बुळबुळीत स्त्राव सोडतो. हा जीव प्रामुख्याने पश्चिम घाटात आढळून येतो. डोळे अगदी छोटे टाचणीच्या आकाराचे आणि सहज न दिसणारे असतात. गोलाकार रिंगण (स्केल्स) असणारे शरीर यावरून त्याची ओळख निश्चिती होते अशी माहिती वरद गिरी यांनी दिली.
या निमित्ताने दोडामार्ग तालुक्यातील पश्चिम घाटालगत असलेल्या गावामधील जैवविविधतेचा अभ्यास करून आढळणारे वन्य जीव आणि इतर जीवांची नोंद करणे आवश्यक आहे असे आंबोली येथील प्रसिद्ध वन्यजीव अभ्यासक आणि छायाचित्रकार महादेव (काका) भिसे यांनी सांगितले.