सावंतवाडी : सावंतवाडी शहरात गेली पाच महिने भाड्याच्या घरात अल्पवयीन मुलीसोबत राहणार्या बीड येथील युवकाला त्या मुलीसहीत शनिवारी संध्याकाळी सावंतवाडी पोलिसांच्या मदतीने बीड पोलिसांनी ताब्यात घेतले. बीड येथे त्या मुलावर मुलीला पळवून नेल्याप्रकरणी गुन्हा नोंद आहे. त्यावरुन पोलिसांनी ही कारवाई केली.
सायंकाळी उशीरा बीड पोलीस त्या दोघांना घेवून रवाना झाले. बीड येथून अल्पवयीन मुलीला फूस लावून पळवून नेत तिला सावंतवाडी येथे एका भाड्याच्या घरात गेली पाच महिने तेथील युवकाने ठेवले होते. ही मुलगी अल्पवयीन असून तिच्या वडिलांनी बीड पोलिसात मुलगी बेपत्ता असल्याची तक्रार दिली होती त्यावरुन अपहरण व पळवून नेल्याप्रकरणी गुन्हा नोंद करण्यात आला होता.गेली पाच महिने बीड पोलिस या मुलीचा शोध घेत होते.
दरम्यान ती सावंतवाडीत असल्याची माहिती मिळताच बीड पोलिसांनी सावंतवाडी पोलिसांशी संपर्क केला. त्यानंतर शनिवारी बीड पोलिसांचे पथक शहरात दाखल झाले. एका भाडयाच्या घरात राहणार्या त्या युवकाला व अल्पवयीन मुलीला सावंतवाडी पोलिसांच्या मदतीने ताब्यात घेतले.