मालवण : जमिनीच्या वारस तपासासाठी दोन अर्जदारांकडून चार हजार रुपयांची मागणी करून ते स्वीकारत असताना मसुरे तलाठी नीलेश किसन दुधाळ (वय 26) यांना अँटिकरप्शन ब्युरो, सिंधुदुर्ग पथकाने रंगेहाथ ताब्यात घेतले. शुक्रवारी सायंकाळी उशिरा ही कारवाई झाली. नीलेश दुधाळ यांच्या विरोधात गुन्हा दाखल करण्याची कार्यवाही सुरू असल्याची माहिती अँटिकरप्शन ब्युरोचे पोलिस उपअधीक्षक विजय पांचाळ यांनी दिली.
निलेश दुधाळ हे मसुरे तलाठी म्हणून कार्यरत आहेत. गावातील दोन ग्रामस्थांनी आपल्या जमिनीचे वारस तपास करण्यासाठी आवश्यक कागदपत्रे एका व्यक्तीकडे दिली होती. त्याने ती सर्व कागदपत्रे मसुरे तलाठी कार्यालयात जमा केली. मात्र सदर दोन्ही अर्ज गेले अनेक दिवस प्रलंबित होते. याबाबत संबंधितांनी तलाठी श्री. दुधाळ यांना विचारणा केली असता प्रत्येक वारस तपास अर्जासाठी दोन हजार याप्रमाणे चार हजार रुपयांची मागणी केली.
याबाबत संबंधित दोन्ही ग्रामस्थांनी अँटी करप्शन सिंधुदुर्ग कार्यालयाकडे तक्रार केली. तक्रारीच्या अनुषंगाने पडताळणी करून सापळा रचण्यात आला. यात निलेश किसन दुधाळ हे चार हजार रुपये घेताना रंगेहात सापडून आले. त्यांना ताब्यात घेऊन त्यांच्यावर लाचखोरीचा गुन्हा दाखल करण्यात आला. ही कारवाई अँटि करप्शन विभाग सिंधुदुर्ग पोलिस उप अधीक्षक विजय पांचाळ यांच्या मार्गदर्शनाखाली पोलिस हवालदार प्रीतम कदम, जनार्डन रेवंडकर, गोविंद तेली, विजय देसाई, अजित हंडे, स्वाती राऊळ, योगेश मुंडे यांच्या पथकाने केली. एसीबीचे ठाणे परिक्षेत्र पोलिस अधीक्षक शिवराज पाटील, अप्पर पोलिस अधीक्षक संजय गोविलकर, सुहास शिंदे, यांच्या मार्गदर्शनाखाली कारवाई व पुढील तपास सुरू असल्याचे उपअधीक्षक श्री. पांचाळ यांनी सांगितले.
