रत्नागिरी : रत्नागिरीतील शिवसेनेचे कट्टर कार्यकर्ते आणि माजी जिल्हा परिषद अध्यक्ष जयसिंग ऊर्फ आबा घोसाळे यांनी ठाकरे शिवसेनेला अखेरचा जय महाराष्ट्र करून आपल्या कार्यकर्त्यांसह पालकमंत्री उदय सामंत यांच्या उपस्थितीत शिवसेनेत प्रवेश केला.
याबाबत पालकमंत्री उदय सामंत म्हणाले, आबा घोसाळे हे कट्टर शिवसैनिक आहेत. शिवसेनेची पहिली ग्रामपंचायत नाचणे त्यांनी निवडून आणली. जिल्हा परिषद अध्यक्ष म्हणून त्यांनी काम केले होते. राज्याचे उद्योगमंत्री तथा रत्नागिरी जिल्ह्याचे पालकमंत्री उदय सामंत यांच्या खांद्याला खांदा लावून आम्ही काम करणार आणि तालुक्यात त्यांना प्रचंड मताने निवडून आणणार, असा विश्वास आबा घोसाळे यांनी पक्षप्रवेशानंतर व्यक्त केला.
माजी जिल्हा परिषद अध्यक्ष जयसिंग (आबा) घोसाळे हे गेल्या काही दिवसांपासून उबाठामधून शिवसेनेत प्रवेश करणार, अशी चर्चा होती. ना. उदय सामंत यांच्या नेतृत्वाखाली त्यांनी शनिवारी शिवसेनेत पक्ष प्रवेश केला. यावेळी त्यांच्या समवेत त्यांचे भाऊ अनिल घोसाळे, अमोल घोसाळे, विक्रांत घोसाळे, अमित घोसाळे, सुमित घोसाळे, अक्षय भाटकर, अतुल घोसाळे, गजेंद्र नाईक, उदय नागवेकर, विश्वजित चौगुले, सचिन वायंगणकर, महेश डोंगरे, बाळकृष्ण घोसाळे, संदेश भाटकर, आकाश भाटकर, मंथन भाटकर, आरोही घोसाळे, मंदार घोसाळे यांनीदेखील शिवसेना पक्षात प्रवेश केला. या पक्ष प्रवेशाच्या कार्यक्रमावेळी शिवसेना तालुका प्रमुख बाबू म्हाप, माजी जिल्हा परिषद सदस्य प्रकाश रसाळ आदी पदाधिकारी उपस्थित होते.