रत्नागिरी : शिवसेना उबाठाच्या उपनेतेपदी निवड झालेल्या माजी आमदार बाळ माने यांनी सोमवारी मुंबईत मातोश्रीवर जाऊन उबाठाचे प्रमुख उध्दव ठाकरे यांची भेट घेतली. यावेळी आगामी जिल्हा परिषद, पंचायत समिती, नगर पालिका निवडणुकांमध्ये कोकण हा उबाठाचा बालेकिल्ला आहे हे सर्वांना दाखवून द्या, असा आशीर्वादही त्यांना ठाकरेंनी दिला.
सहा महिन्यापूर्वी झालेल्या विधानसभा निवडणुकीत कोकणात शिवसेना उबाठाला मोठा धक्का बसला आहे. रत्नागिरीमध्ये उबाठाची एकमेव जागा गुहागरमध्ये निवडून आली. या निवडणुकीमध्ये उबाठाने चांगलीच लढत दिली. अनेक जिल्हा परिषद गटांमध्ये महाविकास आघाडीला जिल्ह्यात अगदी कमी मतांची पिछाडी मिळाली होती. त्यामुळे पुढील निवडणुकीत उबाठा व महाविकास आघाडी हे जि.प. गट व पं.स. गण राखण्यासाठी प्रयत्न करणार आहे. शिवसेनेचे माजी आमदार राजन साळवी हे शिंदेसोबत शिवसेनेत गेल्याने उपनेतेपद रिक्त झाले होते. त्यामुळे ठाकरेेंना शिवसेना किंवा अन्य पक्षांच्या वळचळणीला जाणारे पदाधिकारी नको असून, उबाठाशी प्रामाणिक असणार्यांनाच पुढे जाण्याची संधी दिली जात आहे.
रत्नागिरी विधानसभा मतदार संघात माजी आमदार बाळ माने यांनी चांगली टक्कर उद्योगमंत्र्यांना देत जवळपास 70 हजारहून अधिक मते घेतली. बाळ माने यांचे कार्यकर्त्यांशी आता सूरही चांगले जमू लागले आहेत. भविष्यातील निवडणुका लक्षात घेत आता उबाठाप्रमुख उध्दव ठाकरे यांनी बाळ माने यांच्यावर उपनेतेपदाची जबाबदारी दिली आहे. ही जबाबदारी मिळाल्यानंतर बाळ माने यांनी सोमवारी ठाकरे यांची मातोश्री येथे जाऊन भेट घेतली व त्यांचे अशीर्वाद घेतले. यावेळी पुन्हा एकदा कोकणात उबाठाचा फडकवण्यासाठी आशीर्वाद त्यांना देण्यात आला. यावेळी बाळ माने यांच्यासोबत मिहीर माने, खासदार संजय राऊत उपस्थित होते. खा. राऊत यांनीही बाळ माने यांना भविष्यातील वाटचालीसाठी शुभेच्छा दिल्या.