अहमदनगर; पुढारी वृत्तसेवा : गणेशोत्सव विसर्जन मिरवणूक व मोहंमद पैगंबर जयंतीची मिरणूक यंदा एकाच दिवशी (28 सप्टेंबर) येत आहे. दोन्ही धर्माचे उत्सव शांततेत पार पडण्यासाठी तख्ती दरवाजा ईद मिलादुन्नबी कमिटीच्या वतीने पैगंबर जयंती मिरवणूक 1 ऑक्टोबरला काढण्याचा निर्णय घेतला आहे. मुस्लिम समाजाच्या या निर्णयामुळे हिंदू-मुस्लिम ऐक्याचे दर्शन झाले असून, मुस्लिम समाजाने घेतलेल्या निर्णयाचे सर्वत्र स्वागत होत आहे.
हिंदू-मुस्लिम समाजाचे महत्त्वाचे सण एकाच दिवशी येत असल्याने व दोन्ही उत्सवाचा मिरवणूक मार्ग व वेळ एकच असल्याने पोलिस प्रशासनासमोर बंदोबस्ताचा मोठा पेच निर्माण झाला होता. शहरात धार्मिक एकता व सामाजिक सलोखा कायम राहण्यासाठी मुस्लिम समाजाने पुढाकार घेऊन मोहंमद पैगंबर जयंती उत्सव साजरा करण्याच्या उद्देशाने पोलिस उपअधीक्षक अनिल कातकडे, पोलिस निरीक्षक चंद्रशेखर यादव, तख्ती दरवाजा ईद मिलादुन्नबी कमिटी, मोहरम उत्सव समिती, समाजातील प्रतिष्ठित नागरिक, सर्व यंग पार्टीचे प्रमुख व धर्मगुरू यांच्या उपस्थितीमध्ये तख्ती दरवाजा मशिदीमध्ये बैठक पार पडली.
मोहंमद पैगंबर यांनी इस्लाम धर्माला शांती व प्रेमाचा संदेश दिला असून, त्यांचे विचार जीवनात आचरण करुन आणि समाजात शांतता व प्रेम अबाधित राहण्यासाठी हा निर्णय घेण्यात आला असल्याची माहिती तख्ती दरवाजा ईद मिलादुन्नबी समितीचे अध्यक्ष शेख अब्दुल कादिर व मोहरम उत्सव समितीचे अध्यक्ष हाजी करीमभाई हुंडेकरी यांनी दिली.
पोलिस प्रशासन व मुस्लिम समाजाच्या संघंटनाच्या झालेल्या बैठकीत पैगंबर जयंती मिरवणूक पुढे ढकलण्याचा निर्णय झाला. 28 सप्टेंबरला मोहंमद पैगंबर जयंती घरोघरी व मशिदीत साजरी करून प्रसादाचे वाटप केले जाणार आहे. तर, सार्वजनिक मिरवणूक रविवारी 1 ऑक्टोबरला काढण्याचा सर्वानुमते निर्णय घेण्यात आला.
हेही वाचा