नगर : पुढारी वृत्तसेवा
औरंगाबाद रस्त्यावरील खोसपुरी शिवारात मालवाहू वाहनातून स्टिलच्या सळया, पाईप चोरून काढून विक्रीसाठी साठा करणार्यांना नाशिक परिक्षेत्राचे विशेष पोलिस महानिरीक्षक बी. जी. शेखर पाटील यांच्या पथकाने छापा घालून पकडले. त्यांच्याकडून एक कोटी 10 लाख 88 हजार 929 रुपयांचा साठा जप्त केला. याबाबत एमआयडीसी पोलिस ठाण्यात गुन्हा दाखल झाला आहे.
आदिनाथ रावसाहेब आव्हाड (रा. पांगरमल ता.जि.नगर), ऋषिकेश रामकिसन वाघ (रा. वाघवाडी ता. नेवासा), चेतन राजेंद्र हरपुडे, शिवाजी नामदेव कुर्हाटे, गोरक्षनाथ आसाराम सावंत (सर्व रा. शिंगवे तुकाई ता.नेवासा), तात्याराव अशोक सपरे, परशुराम अशोक सपरे (दोघे रा. महाकाळा ता.आबंड जि.जालना), शैलेश ज्ञानोबा तांदळे (रा. हिंगणी ता.जि.बीड) अशी आरोपींची नावे आहेत.
नगर- औरंगाबाद रस्त्यावर खोसपुरी शिवारात पांढरीपुलाजवळ हॉटेल संग्राम पॅलेसच्या शेजारी मोकळ्या जागेत मालवाहू ट्रकमधील स्टिल चोरी करून काही लोक साठवणूक करीत असल्याची माहिती विशेष पोलिस महानिरीक्षक बी. जी. शेखर पाटील यांच्या पथकाला मिळाली. त्यानुसार पथकाने शनिवारी रात्री खोसपुरी शिवारात छापा घालून कारवाई केली.
त्यात आठ जणांना ताब्यात घेतले. त्यांच्याकडून साठवणूक केलेले स्टिल, टेम्पो, लेटर, मालवाहू वाहने असा एक कोटी दहा लाख 88 हजारांचा मुद्देमाल जप्त केला. याबाबत पोलिस नाईक शकील शेख यांच्या फिर्यादीवरून एमआयडीसी पोलिस ठाण्यात गुन्हा दाखल झाला आहे.