भारतीय नौदलाच्या प्रोजेक्ट-७५ अंतर्गत सहा पाणबुड्यांपैकी चौथी पाणबुडी 'आयएनएस वेला' ( INS Vela joins Navy ) ही गुरुवारी नौदलाच्या ताफ्यात सामील झाली. नौदलप्रमुख ऍडमिरल करमबीर सिंग यांच्या हस्ते ही पाणबुडी नौदलास सुपूर्द करण्यात आली. मुंबईतील नेव्हल डॉकयार्ड येथे हा औपचारिक सोहळा पार पडला.
फ्रान्सच्या मे. नेव्हल ग्रुपच्या (पूर्वीची डीसीएनएस) सहकार्याने मुंबईतल्या माझगाव डॉक शिपयार्डस लिमिटेडमध्ये स्कॉर्पिन श्रेणीतील ही पाणबुडी बांधण्यात आली. नौदलाच्या ताफ्यात आयएनएस वेलाच्या रुपात स्कॉर्पियन प्रकारातील ही चौथी पाणबुडी सामील झाली आहे.
( INS Vela joins Navy ) आयएनएस वेला ही पश्चिम नौदल कमांडच्या पाणबुडीच्या ताफ्याचा भाग असेल आणि शस्त्रागाराचा आणखी एक शक्तिशाली भाग असेल.
खासदार अरविंद सावंत, पश्चिमी नेव्हल कमांडचे फ्लॅग ऑफिसर कमांडिंग-इन-चीफ व्हॉईस अॅडमिरल आर. हरी कुमार, माझगाव जहाजबांधणी गोदीचे अध्यक्ष आणि व्यवस्थापकीय संचालक व्हॉईस अॅडमिरल (निवृत्त) नारायण प्रसाद यांच्यासह संरक्षण मंत्रालयाचे वरिष्ठ प्रशासकीय आणि लष्करी अधिकारी या समारंभात उपस्थित होते. याधीच्या वेला या रशियन बनावटीच्या फॉक्सट्रॉट श्रेणीच्या आणि २००९मध्ये सेवानिवृत्त झालेल्या पाणबुडीचा कर्मचारी वर्ग देखील या कार्यक्रमाला पाहुणे म्हणून हजर होता.