पुढारी ऑनलाइन डेस्क : ISRO START : अंतराळ विज्ञान आणि तंत्रज्ञान विषय जाणून घेण्यास आणि या विषयात करिअरची इच्छा असलेले विद्यार्थी तसेच अन्य उत्सुकांसाठी ISRO कडून संधी उपलब्ध करून देण्यात आली आहे. ISRO ने एक ऑनलाइन कार्यक्रम START निश्चित केला आहे. यामध्ये पृथ्वी आणि पृथ्वीजवळील अंतराळ, सौर यंत्रणा शोध, उपकरणे इत्यादी बाबींचा समावेश आहे. इस्रोच्या ई-क्लास प्लॅटफॉर्म https://eclass.iirs.gov.in वर हा कोर्स आणि यासंबंधीची व्याख्याने असणार आहेत.
ISRO ने मे महिन्यात या अभ्यासक्रमाची घोषणा केली होती. मात्र, त्यावेळी केवळ फिजिक्स, अॅस्ट्रोफिजिक्स या क्षेत्रातील अंडर ग्रॅज्युएट किंवा पोस्ट ग्रॅज्युएट विद्यार्थ्यांसाठीच हा अभ्यासक्रम मर्यादित होता. मात्र, आता हा कार्यक्रम सर्वांसाठी खुला करण्यात आला आहे. अंतराळ विज्ञानाविषयी जाणून घेण्यास उत्सुक असणाऱ्या प्रत्येकाला या अभ्यासक्रमासाठी नोंदणी करता येणार आहे.
स्पेस सायन्स अँड टेक्नॉलॉजी अवेअरनेस ट्रेनिंग (स्टार्ट- START) हा ISRO ने अंतराळ विज्ञान आणि तंत्रज्ञानातील ऑनलाइन परिचयात्मक-स्तरीय जागरूकता कार्यक्रम म्हणून परिकल्पित केलेला एक कार्यक्रम आहे.
व्याख्यानांमध्ये पृथ्वी आणि पृथ्वीजवळील अंतराळ, सौर यंत्रणा अन्वेषण, अंतराळ मोहिमेची रचना आणि निरीक्षणे, खगोलशास्त्र, खगोल भौतिकशास्त्र आणि विश्वविज्ञान यांचा समावेश होतो. अंतराळात प्रवेश, अंतराळ उपकरणे, भारतीय अंतराळ संशोधन कार्यक्रमावरील व्याख्याने आणि अवकाश विज्ञान क्षेत्रातील संशोधनाच्या संधी यासारख्या तांत्रिक बाबींचा समावेश आहे.
ISRO च्या ई-क्लास प्लॅटफॉर्म https://eclass.iirs.gov.in द्वारे ऑनलाइन 2-3 आठवड्यांसाठी 2-3 तास/दिवस व्याख्यानांसह जुलै-ऑगस्ट 2023 मध्ये प्रशिक्षण तात्पुरते नियोजित आहे. हा कार्यक्रम प्रामुख्याने विज्ञान आणि तंत्रज्ञानाच्या पदवीपूर्व आणि पदव्युत्तर विद्यार्थ्यांसाठी आहे. मात्र अनेक जणांनी दाखविलेल्या उत्सुकतेच्या आधारे, आता इतर विद्यार्थी आणि उत्साही लोकांसाठी देखील हा अभ्यासक्रम खुला करण्यात आला आहे.
या ऑनलाइन अभ्यासक्रमासाठी कोणीही प्रवेश घेऊ शकतो. यासाठी इस्रोच्या या https://elearning.iirs.gov.in/edusatregistration/student वेबसाइटवर नोंदणी करू शकता. नोंदणीनंतर अॅक्टिव्हेशनसाठी एक लिंक ई-मेलद्वारे पाठवली जाईल. त्याद्वारे START कार्यक्रम निवडू शकता आणि नोंदणी पूर्ण करू शकता.
या कार्यक्रमासाठी 280 हून अधिक संस्थांना नोडल केंद्र म्हणून मान्यता देण्यात आली आहे. या संस्थांचे विद्यार्थी परीक्षा आणि गुणवत्ता प्रमाणपत्रासाठी पात्र होण्यासाठी स्क्रोल-निवड करून संस्था/नोडल केंद्राद्वारे नोंदणी करू शकतात.
कोणत्याही संस्थेचे विद्यार्थी किंवा सामान्य उत्साही व्यक्ती त्याच लिंकवर (https://elearning.iirs.gov.in/edusatregistration/student) वैयक्तिकरित्या नोंदणी करू शकतात. नोंदणीनंतर https://www.youtube.com/@edusat2004 या यु ट्यूब लिंकच्या माध्यमातून सत्रांसाठी उपस्थित राहू शकतात. यु ट्यूबवर हे सत्र नोंदणी न करता देखील पाहू शकतात.
नोंदणी/प्रवेश शुल्क
START कार्यक्रम विनामूल्य आहे. कोणतेही नोंदणी शुल्क/प्रवेश शुल्क नाही. नोंदणीची अंतिम तारीख 15 जुलै 2023 आहे.
हे ही वाचा :