फोंडा: पुढारी वृत्तसेवा
बेतोडा-फोंडा चौपदरी महामार्गावर गव्याच्या हल्ल्यात पोलिस खात्यातील गृहरक्षक ठार झाले. ही घटना बुधवारी संध्याकाळी साडेसहा वाजण्याच्या सुमारास घडली असून मृताचे नाव दिनेश तुळशीदास गावडे (४८ वर्षे) असे आहे.
ते उडीवाडा - उसगाव येथील रहिवासी होते. दिनेश गावडे हे फोंडा पोलिस स्थानकात गृहरक्षक म्हणून कार्यरत होते. ड्युटीवरून घरी जाताना बेतोडा येथील आपल्या मित्राला भेटण्यासाठी दिनेश गावडे दुचाकी रस्त्याच्या कडेला थांबवून चालत जात असताना झाडीत असलेल्या गवा अचानक त्यांच्या समोर आला.
गव्याला पाहून पळ काढण्याच्या प्रयत्नात असताना गव्याने त्यांच्यावर पाठीमागून हल्ला करत दिनेशच्या पाठीत शिंगे खुपसली. गंभीर जखमी अवस्थेत दिनेश यांन आरडाओरड केल्यानंतर त्यांना फोंडा आयडी उपजिल्हा इस्पितळात उपचार करण्यासाठी दाखल करण्यात आले.
मात्र, रात्री उपजारादरम्यान त्यांचा मृत्यू झाला. त्यांच्या पश्चात पत्नी व दोन मुत् आहेत. दरम्यान, १२ ऑक्टेबर २०२४ रोजी बेतोडा येथील मंगला गावडे हिच्यावर गव्याने हल्ला केल्याने तिचा मृत्यू झाल होता. वन खात्याने या प्रकारची गंभीर दखल घेऊन गव्यांना हुसकावून लावावे अशी मागणी स्थानिकांमधून होत आहे.