पणजी: पुढारी वृत्तसेवा
उत्तर गोव्यातील सुमारे दोन लाख जमीन नोंदणी अभिलेख, जे शंभर वर्षांहून अधिक जुने आहेत, त्यांचे डिजिटायझेशन पूर्ण झाले असून हे अभिलेख लवकरच ऑनलाईन उपलब्ध करून देण्याचा प्रस्ताव सरकारकडे सादर करण्यात आला आहे. अधिकाऱ्यांनी दिलेल्या माहितीनुसार, १८६८ ते १९६८ या कालावधीतील हे अभिलेख ६५७पुस्तकांमध्ये नोंदवलेले असून सुमारे दोन लाख पानांचा समावेश आहे.
या प्रक्रियेत अभिलेखांचे जतन आणि दुरुस्तीचे कामही करण्यात आले असून जपानी कागदासारख्या विशेष साहित्याचा वापर करण्यात आला. काही अभिलेखांची प्रतिमा अधिक स्पष्ट करण्यासाठी पुन्हा डिजिटायझेशन करण्यात आले.
सध्या उत्तर गोव्यातील सर्व जमीन नोंदणी अभिलेख पूर्णपणे डिजिटल स्वरूपात उपलब्ध झाले आहेत, असे अधिकाऱ्यांनी सांगितले. हे अभिलेख अद्याप ऑनलाईन उपलब्ध नसले, तरी त्यासाठी स्वतंत्र प्रणाली तयार करण्याचा प्रस्ताव शासनाकडे मंजुरीसाठी पाठवण्यात आला आहे.
पहिल्या टप्प्यात केवळ जमीन नोंदणी अभिलेखच ऑनलाईन उपलब्ध केले जाणार आहेत. मंजुरी मिळाल्यानंतर नागरिकांना तालुका आणि नोंदणी क्रमांक टाकून गोवा ऑनलाईन पोर्टलद्वारे अभिलेख पाहता येणार आहेत. सध्या हे डिजिटल अभिलेख विभागीय कार्यालयांमध्ये संगणकाद्वारे पाहता येतात, मात्र मूळ कागदी अभिलेख पाहण्यासाठी दिले जात नाहीत.
नोंदणी क्रमांक दिल्यास अभिलेख काही मिनिटांत स्क्रीनवर पाहता येतात. डिजिटल अभिलेखांच्या प्रमाणित प्रती पाच कामकाजाच्या दिवसांत दिल्या जातात, तर तातडीच्या प्रकरणांमध्ये शुल्क भरून तत्काळ सेवा उपलब्ध करून दिली जाते.