पणजी : पुढारी वृत्तसेवा
साखळी येथील चिकणे-कुडणे येथे ५५ वर्षीय शैला संजय घाडी या महिलेला सागर राऊळ (रा. सावंतवाडी) या तरुणाने बेदम मारहाण केल्याने तिचा मृत्यू झाला. याप्रकरणी डिचोली पोलिसांनी खुनाचा गुन्हा नोंद केला आहे.
ही घटना मंगळवारी घडली असून संशयित घटनास्थळावरून तिची सोनसाखळी व मोबाईल घेऊन फरार झाला आहे. पोलिस त्याचा शोध घेत आहेत. पोलिसांकडून मिळालेल्या माहितीनुसार, संशयित सागर राऊळ याचे घाडी कुटुंबियाकडे येणे-जाण होते.
मयत शैला घाडी हिला दोन मुली व एक मुलगा अशी मुले आहेत. यापैकी एका मुलीशी संशयिताची मैत्री होती. काही दिवसांपूर्वी संशयिताचा घाडी कुटुंबियाशी वाद झाला होता व याप्रकरणी डिचोली पोलिसात अदखलपात्र गुन्हा नोंदवण्यात आला होता. त्यामुळे संशयिताला त्याचा राग होता.
मंगळवारी सकाळी शैला घाडी हिची मुले सकाळी कामाला निघून गेल्यावर संशयित सागर हा दुपारच्या सुमारास आला. त्याने तिच्याशी भांडण सुरू केले. या भांडणाचे रुपांत मारहाणीत झाले. संशयिताने शैला घाडी हिचे डोके व चेहरा भिंतीवर वारंवार आपटल्याने तिच्या चेहऱ्याला व डोक्याला जबर जखमा झाल्या.
या झटापटीत त्याने तिची सोनसाखळी व मोबाईल घेऊन पसार झाला. त्याने याच मोबाईलवरून एका मुलीला फोन करून आईला मारहाण केल्याची माहिती दिली. मुलीने फोन केल्यावर पोलिस घटनास्थळी दाखल झाले व पंचनामा केला. तो सावंतवाडीचा रहिवाशी असल्याने तेथेही शोध घेतला. मात्र, तो सापडला नाही.