पणजीत किमान तापमान 18°C; 2025 मधील दुसरे नीचांकी तापमान.
रात्री व पहाटे तीव्र थंडी, काही भागांत धुके.
दुपारनंतर उन्हाची तीव्रता वाढत असल्याचे निरीक्षण.
डिसेंबरमध्ये किमान तापमान सरासरीपेक्षा कमी राहण्याचा अंदाज.
पणजी : पुढारी वृत्तसेवा
राज्यात थंडी कायम असून हुडहुडी थांबण्याचे नाव घेत नाही अशी स्थिती आहे. गेल्या काही दिवसांपासून सकाळी ११ नंतर तापमानात वाढ होते आणि संध्याकाळी पाच सहा वाजता कडाक्याची थंडी जाणवू लागते.
पणजीमध्ये शनिवारी, रविवारी १८ अंश सेल्सिअस किमान तापमानाची नोंद झाली. हे २०२५ या वर्षातील पणजीतील दुसरे नीचांकी तापमान ठरले आहे. याआधी १२ डिसेंबर २०२५ रोजी पणजीत किमान १७.५ अंश सेल्सिअस तापमानाची नोंद झाली होती.
हवामान खात्याने पुढील सहा दिवस राज्यातील किमान तापमान १८ ते २० अंश सेल्सिअस दरम्यान राहण्याची शक्यता वर्तवली आहे. सध्या राज्यात रात्री आणि पहाटे तीव्र थंडी जाणवत आहे.
पहाटे काही ठिकाणी धुके पडत असून सकाळी गार वाऱ्याची झुळूक अनुभवायला मिळत आहे. मात्र, दुपारनंतर उन्हाची तीव्रता वाढत आहे. राज्यात डिसेंबर महिन्यातील किमान तापमान साधारणपणे २० ते २२ अंशांच्या दरम्यान असते,
मात्र गेल्या काही दिवसांत किमान तापमान सरासरीपेक्षा १.५ ते ३.९ अंशांनी कमी नोंदवले गेले आहे. डिसेंबर महिन्यात राज्यातील किमान तापमान सरासरीपेक्षा कमी राहील, अशी शक्यता हवामान खात्याने याआधीच व्यक्त केली होती.
गावागावात शेकोट्या पेटल्या
वाढत्या थंडीने हैराण झालेल्या गावकऱ्यांना शेकोटीचाच आधार वाटू लागला आहे. रात्री जेवणापूर्वी आणि जेवणानंतर गावागावांत शेकोट्या पेटू लागल्या आहेत. शेकोटी भोवती जमलेल्यांचे गप्पांचे फडही रंगू लागले आहेत.