पणजी : पुढारी वृत्तसेवा
बनावट उत्पादन शुल्क आयुक्त नोकरी घोटाळा प्रकरणातील संशयित अजित शंखवाळकर याची पत्नी रुपाली शंखवाळकर हिने दाखल केलेल्या अटकपूर्व जामीन अर्जावर उत्तर सादर करण्याचे निर्देश उत्तर गोवा अतिरिक्त सत्र न्यायालयाने पणजी पोलिसांना दिले आहेत. त्यावरील सुनावणी २६ ऑक्टोबरला ठेवली आहे.
संशयित अजित शंखवाळकर याच्याविरुद्ध पणजी पोलिस स्थानकात गुन्हा नोंद झाल्यानंतर त्याचा ठावठिकाणा शोधण्यासाठी पोलिसांनी त्याच्या कुटुंबाशी संपर्क साधून माहिती देण्यास सांगितले होते.
दरम्यान, चौकशीसाठी त्याची पत्नी रुपाली शंखवाळकर हिला पोलिस स्थानकात उपस्थित राहण्याची नोटिस बजावण्यात आली होती. तिने हजेरी न लावता अटकपूर्व जामिनासाठी न्यायालयात धाव घेतली आहे. त्यामुळे या प्रकरणात तिचाही समावेश आहे की काय, असा पोलिसांचा संशय बळावला आहे.
पणजी पोलिसांनी संशयित अजित शंखवाळकर याच्याविरुद्ध लूकआउट नोटिस जारी केली आहे. शेजारील राज्यात त्याचा शोध घेण्यासाठी पोलीस पथके तैनात करण्यात आली आहेत. सरकारी नोकरीची बनावट नियुक्तीपत्रे तसेच जमीन मालमत्तेची खोटी कागदपत्रे तयार करून तळेकर कुटुंबाची सुमारे १.२७ कोटींची फसवणूक केल्याचा त्याच्यावर आरोप आहे.