पुणे; पुढारी वृत्तसेवा : झेन मनी प्लॅन्ट नावाचे कंपनीत पैसे गुंतवणुक केल्यास गुंतवणुक केलेल्या रकमेवर वार्षिक 36 टक्के परतावा देण्याचे अमिष दाखवून तब्बल 11 कोटी 26 लाख 37 हजार रुपयांची फसवणूक करण्यात आल्याचा धक्कादायक प्रकार उघडकीस आला आहे.
फसवणूक करण्यात आलेले ओशो आश्रमाशी संबंधित आहेत. यामध्ये काही विदेशी नागरिकांचा देखील समावेश आहे. याप्रकरणी कोरेगाव पार्क पोलीस ठाण्यात झेन मनी प्लॅन्ट कंपनीचे नटराजन बालसुब्रमण्यम आणि ज्या महिलेच्या खात्यावर पैसे पाठविण्यात आले ती पुनम भालेराव अशा दोघांना याप्रकरणी अटक करण्यात आली आहे. याप्रकरणात शेरॉन नदान, मुकेश गाबा, हिरेन वासानी, नाझिया तांबोळी यांच्यावर गुन्हा दाखल करण्यात आला आहे.
याबाबत सुरेशकुमार अप्पलराजु वर्मा (वय-43,रा.पुणे) यांनी पोलीसांकडे फिर्याद दाखल केली आहे. कोरेगाव पार्क येथे झेन मनी प्लॅन्ट कंपनीचे कार्यालय आहे. सदर कंपनीचे संचालक नटराजन बालसुब्रहमण्यम व शेरॉन नदान यांनी 2 जुलै 2020 ते 12 ऑक्टोबर 2021 यादरम्यान तक्रारदार सुरेशकुमार वर्म आणि त्यांच्या ओळखीच्या लोकांना कंपनीत गुंतवणुक केल्यास चांगला परतावा मिळेल असे अमिष दाखवले.
फसवणूक झालेले गुंतवणुकदार ओशो आश्रमाशी संबंधित आहेत. आतापर्यंत 11 फसवणुक झालेले नागरिक समोर आले आहेत. अशी कोणाची फसवणूक झाली असेल तर त्यांनी पोलिसांशी संपर्क साधावा.
– विजयकुमार पळसुले, सहायक पोलिस आयुक्त, आर्थिक गुन्हे शाखा
कंपनीत पैसे गुंतवणुक केल्यास गुंतवणुक केलेल्या रकमेवर वार्षिक 36 टक्के व मासिक अनुक्रमे2,3,4,5 टक्के असा परतावे देवून मुद्दल व त्यावरील परताव्याची रक्कम 18 महिन्यात परत देवू असे अमिष दाखवले. त्या रकमेपोटी तक्रारदार व त्यांचे परिचयातील इतर गुंतवणुकदारांनी गुंतवणुक केलेल्या रकमेबाबतचे नोटराईज्ड प्रतिज्ञापत्र, इन्वहेस्टमेंट रिसीप्ट, अकाऊंट ओपनिंग फॉर्म, सिक्युरीटी चेक अशी हमीपत्रे देवून त्यांचा विश्वास संपादन करुन त्यांना कोणातही परतावा अथवा मुद्दल न देता तसेच इतर गुंतवणुकदारांची अशी एकूण 11 कोटी 26 लाख रुपयांची आर्थिक फसवणुक करण्यात आली आहे.
हे सर्व गुंतवणुकदार ओशो आश्रमाशी संबंधीत असून त्यामध्ये देशी आणि विदेश नागरिकांचा समावेश आहे. गुंतवणुकदारांनी गुंतवणुक केलेल्या रक्कमेचा वापर हा आरोपींनी त्यांचे व्यैक्तिक कामाकरिता केला आहे.
हे ही वाचलं का ?