Stock Market Today: आठवड्याच्या शेवटच्या दिवशी शेअर बाजाराने सकारात्मक सुरुवात केली. आज सेन्सेक्स 184 अंकांच्या वाढीसह 77,370 वर, तर निफ्टीने 55 अंकांच्या वाढीसह 24,127 वर व्यवहार सुरू केला.
मात्र जागतिक बाजारातील घसरण, अमेरिका-इराणमधील वाढता तणाव आणि परदेशी संस्थात्मक गुंतवणूकदारांची (FII) विक्री यामुळे गुंतवणूकदार सावध भूमिका घेत असल्याचे दिसून आले. गेल्या काही दिवसांपासून निफ्टी 24,000 ते 24,200 या मर्यादित पट्ट्यात व्यवहार करत आहे.
अमेरिकेतील सेमिकंडक्टर कंपन्यांच्या शेअर्समध्ये मोठी विक्री झाल्याने नॅस्डॅक निर्देशांक सुमारे 1.5 टक्क्यांनी घसरला. त्याचा परिणाम आशियाई बाजारांवरही दिसून आला. जपानचा निक्केई निर्देशांक 4 टक्क्यांहून अधिक घसरला, तर दक्षिण कोरियाचा कोस्पी बाजार बंद होता.
अमेरिका-इराण तणाव कायम असल्यामुळे ब्रेंट क्रूडचा भाव 85 डॉलरच्या आसपास स्थिर आहे. दुसरीकडे सोन्या-चांदीच्या दरात घसरण सुरूच आहे. रुपयावरही दबाव कायम असून, गुरुवारी डॉलरच्या तुलनेत रुपया 96.35 या नीचांकी पातळीवर बंद झाला होता. मात्र शुक्रवारी सकाळी तो किंचित सुधारत 96.31 वर व्यवहार करत होता.
विश्लेषकांच्या मते, देशांतर्गत म्युच्युअल फंडांकडून सुरू असलेली खरेदी, टेक महिंद्राचे अपेक्षेपेक्षा चांगले तिमाही निकाल, आयटी क्षेत्रातील संभाव्य तेजी आणि कमी असलेला VIX निर्देशांक हे बाजारासाठी सकारात्मक संकेत आहेत.
मात्र परदेशी संस्थात्मक गुंतवणूकदारांनी (FII) सुमारे 4,205 कोटी रुपयांची विक्री केल्यामुळे दबाव वाढला आहे. याशिवाय अमेरिकन आणि आशियाई बाजारातील घसरण, रुपयाची घसरण आणि पश्चिम आशियातील भू-राजकीय तणावामुळे गुंतवणूकदारांमध्ये सावधगिरीचे वातावरण आहे.
एचडीएफसी सिक्युरिटीजचे तांत्रिक विश्लेषक नागराज शेट्टी यांच्या मते, अल्पकालीन काळात बाजार मर्यादित पट्ट्यातच व्यवहार करण्याची शक्यता आहे. 24,000 ते 23,800 हा निफ्टीसाठी महत्त्वाचा सपोर्ट झोन असून, तो कायम राहिल्यास निर्देशांक पुन्हा 24,200 ते 24,600 या पातळीकडे वाटचाल करू शकतो. त्यामुळे सध्या 24,000 ही पातळी गुंतवणूकदारांसाठी अत्यंत महत्त्वाची मानली जात आहे.