Stock Market Today: आठवड्याच्या एक्सपायरीच्या दिवशी भारतीय शेअर बाजाराची सुरुवात घसरणीसह झाली. सुरुवातीच्या व्यवहारात निफ्टी 24,600 च्या खाली घसरला, तर गुंतवणूकदारांकडून प्रॉफिट बुकिंग (Profit Booking) झाल्याचे चित्र दिसून आले. मात्र, बाजारातील तज्ज्ञांच्या मते दीर्घकालीन ट्रेंड अद्याप सकारात्मक असून पुढील काही दिवसांत बाजाराची दिशा RBI च्या पतधोरण बैठकीवर अवलंबून असेल.
आज बाजार सुरू होताच निफ्टी 70 अंकांच्या घसरणीसह 24,703 वर, तर सेन्सेक्स 493 अंकांच्या वाढीसह 79,132 वर उघडला. मात्र, व्यवहार सुरू झाल्यानंतर प्रॉफिट बुकिंगचा दबाव वाढल्याने निफ्टीमध्ये 175 हून अधिक अंकांची घसरण झाली आणि तो 24,600 च्या खाली घसरला. दरम्यान, डॉलरच्या तुलनेत रुपया 1 पैशाने घसरुन 95.33 या पातळीवर उघडला.
याआधी सोमवारी शेअर बाजारात जोरदार तेजी पाहायला मिळाली होती. निफ्टी 390 अंकांनी वाढून 24,774 या पातळीवर बंद झाला होता. त्यामुळे आज अनेक गुंतवणूकदारांनी प्रॉफिट बुकिंगला प्राधान्य दिल्याचे दिसून आले.
अमेरिकेच्या शेअर बाजारात सलग तिसऱ्या दिवशी जोरदार तेजी पाहायला मिळाली. डाऊ जोन्स निर्देशांक 693 अंकांनी वाढून नव्या उच्चांकावर पोहोचला. मात्र, आशियाई बाजारांमध्ये घसरण दिसून आली. जपानचा निक्केई आणि दक्षिण कोरियाचा KOSPI हे दोन्ही निर्देशांक सुमारे अर्धा टक्का घसरले.
सध्या कच्च्या तेलाची किंमत 84.5 डॉलर प्रति बॅरलच्या आसपास व्यवहार करत आहे.
याशिवाय,
परदेशी संस्थात्मक गुंतवणूकदारांनी (FII) सोमवारी 922 कोटी रुपयांची खरेदी केली.
देशांतर्गत संस्थात्मक गुंतवणूकदारांनी (DII) 1,571 कोटी रुपयांची खरेदी केली.
डॉलरच्या तुलनेत रुपया सोमवारी 12 पैशांनी मजबूत होत 95.31 वर बंद झाला.
आजपासून रिझर्व्ह बँकेच्या (RBI) मॉनेटरी पॉलिसी कमिटी (MPC) ची बैठक सुरू झाली आहे. बुधवारी RBI गव्हर्नर संजय मल्होत्रा व्याजदरासंदर्भातील निर्णय जाहीर करणार आहेत.
तज्ज्ञांच्या मते, यावेळी व्याजदरात कोणताही बदल होण्याची शक्यता कमी आहे. मात्र, महागाई, आर्थिक विकासदर आणि पुढील धोरणात्मक संकेतांवर गुंतवणूकदारांचे विशेष लक्ष असेल.
तांत्रिक विश्लेषकांच्या मते, निफ्टीने नुकताच 24,400 ते 24,500 या महत्त्वाच्या पातळीवर ब्रेकआउट दिला आहे. त्यामुळे बाजाराचा दीर्घकालीन कल सकारात्मक राहू शकतो.
रेझिस्टन्स (लक्ष्य): 24,800 ते 25,000
सपोर्ट: 24,400
जर प्रॉफिट बुकिंगचा दबाव कायम राहिला, तर निफ्टीला 24,400 या पातळीवर आधार मिळू शकतो. तर सकारात्मक वातावरण कायम राहिल्यास निर्देशांक पुन्हा 25,000 च्या दिशेने वाटचाल करू शकतो.