Stock Market Today: आठवड्याच्या तिसऱ्या दिवशीही शेअर बाजारातील घसरण कायम आहे. आज सकाळच्या व्यवहारात राष्ट्रीय शेअर बाजाराचा प्रमुख निर्देशांक निफ्टी 84 अंकांनी घसरून 25,648 वर उघडला, तर मुंबई शेअर बाजाराचा सेन्सेक्स 269 अंकांनी घसरत 83,358 वर सुरू झाला. बाजार उघडल्यानंतर काही वेळ निफ्टी 25,700 च्या आसपास फिरताना दिसून आला.
मंगळवारीही बाजारात घसरण झाली होती. त्या दिवशी निफ्टी 58 अंकांनी घसरून 25,732 वर बंद झाला होता. सलग घसरणीमुळे गुंतवणूकदारांमध्ये सावध वातावरण पाहायला मिळत आहे.
आजच्या व्यवहारात आयटी, ऑटोमोबाईल आणि रिअल्टी क्षेत्रातील शेअर्समध्ये घसरण दिसून आली. या सेक्टरमधील निर्देशांक लाल रंगात व्यवहार करत होते. दुसरीकडे मेटल्स, ऑइल अँड गॅस तसेच सरकारी बँकांचे (PSU Banks) शेअर्स तुलनेने तेजीत होते आणि हिरव्या रंगात दिसले.
सेन्सेक्सच्या टॉप-30 कंपन्यांपैकी 10 शेअर्समध्ये तेजी तर 20 शेअर्समध्ये घसरण झाली आहे. NTPC, भारत इलेक्ट्रॉनिक्स, टाटा स्टील आणि इन्फोसिस या शेअर्समध्ये अर्धा ते एक टक्का वाढ झाली. तर आशियन पेंट्स, TCS, बजाज फिनसर्व आणि कोटक महिंद्रा बँक या शेअर्समध्ये सर्वाधिक घसरण पाहायला मिळाली. या शेअर्समध्ये सुमारे 1 ते 1.5 टक्क्यांपर्यंत घसरण झाली.
सध्या शेअर बाजार 25,500 ते 26,000 या रेंजमध्ये अडकलेला आहे. बाजार 25,700 च्या आसपास घसरला की खरेदीचा जोर वाढताना दिसतो, म्हणजेच हा भाग ‘डिमांड झोन’ मानला जात आहे. मात्र निफ्टी 26,000 च्या जवळ पोहोचला की गुंतवणूकदार प्रॉफिट बुकिंग करत असल्याने बाजारावर दबाव आहे.
तज्ज्ञांच्या मते, सध्या बाजारात अस्थिरता आहे. त्यामुळे गुंतवणूकदारांनी घाईघाईने निर्णय न घेता सावधगिरी बाळगणे आणि निवडक शेअर्समध्येच गुंतवणूक करणे योग्य आहे.