Stock Market Today: आज (2 एप्रिल) भारतीय शेअर बाजारात मोठी घसरण पाहायला मिळाली. बाजार उघडताच सेन्सेक्स तब्बल 1,500 अंकांनी घसरला, तर निफ्टी 22,300 च्या खाली गेला.
या घसरणीमागचे प्रमुख कारण म्हणजे वाढलेला भू-राजकीय तणाव. अमेरिकेचे राष्ट्राध्यक्ष डोनाल्ड ट्रम्प यांनी इराणविरोधात कठोर भूमिका घेतल्यामुळे जागतिक बाजारात अनिश्चितता वाढली आहे. यामुळे गुंतवणूकदारांनी सावध भूमिका घेतली असून बाजारात विक्रीचा दबाव वाढला आहे.
GIFT निफ्टी सुमारे 340 अंकांनी खाली होता, ज्यामुळे भारतीय बाजारात कमकुवत सुरुवातीचे संकेत मिळाले होते. जपानचा निक्केई निर्देशांकही 1000 अंकांनी घसरला, तर इतर आशियाई बाजारांमध्येही मोठी घसरण दिसून आली.
कच्च्या तेलाच्या किमती $105 च्या वर गेल्यामुळे महागाई आणि चालू खात्याच्या तुटीबाबत चिंता वाढली आहे. ऊर्जा दर वाढल्याने अर्थव्यवस्थेवर दबाव येण्याची शक्यता असल्याने बाजारात नकारात्मक वातावरण निर्माण झालं आहे.
परदेशी गुंतवणूकदार (FIIs) सलग 22व्या दिवशी विक्री करत आहेत. गेल्या 24 दिवसांत फक्त 2 दिवस खरेदी झाली आहे, ज्यामुळे बाजारावर दबाव कायम आहे. आजच्या घसरणीत PSU बँक आणि फार्मा क्षेत्रातील शेअर्स टॉप लूझर्स ठरले. गुंतवणूकदारांनी या सेक्टर्समध्ये मोठ्या प्रमाणात विक्री केल्याचं दिसून आलं.
रुपया डॉलरच्या तुलनेत कमकुवत होत असून अलीकडेच त्याने ऐतिहासिक नीचांक गाठला आहे. यामुळे परदेशी गुंतवणूकदारांचा आत्मविश्वास कमी झाला आहे.
एकीकडे जागतिक तणाव, वाढलेले तेलाचे दर आणि FIIs ची विक्री, तर दुसरीकडे कमकुवत जागतिक संकेत, या सगळ्यांचा एकत्रित परिणाम बाजारावर दिसत आहे. आजच्या घसरणीमुळे बाजारात अस्थिरता वाढण्याची शक्यता असून गुंतवणूकदारांनी सावधगिरी बाळगणे गरजेचे आहे.