Post Office PPF Scheme Explained: जर तुम्हाला दरमहा गुंतवणूक करायची असेल तर पोस्ट ऑफिसची एक सरकारी योजना तुमच्यासाठी उपयुक्त ठरू शकते. पोस्ट ऑफिसच्या बचत योजना देशभरात लोकप्रिय आहेत. यामधील पब्लिक प्रोव्हिडंट फंड (PPF) ही योजना विशेषतः कमी जोखमीची आणि करमुक्त परतावा देणारी आहे.
PPF योजनेत सध्या सरकारकडून 7.1 टक्के वार्षिक व्याज दिले जाते. हे व्याज पूर्णपणे करमुक्त असते. त्यामुळे ही योजना मध्यमवर्गीय आणि नोकरदार वर्गासाठी फायदेशीर आहे. या योजनेत गुंतवलेली रक्कम कलम 80C अंतर्गत करसवलतीस पात्र ठरते. म्हणजेच गुंतवणूक, त्यावर मिळणारे व्याज आणि मॅच्युरिटीवर मिळणारी संपूर्ण रक्कम या तिन्ही गोष्टी करमुक्त आहेत.
पोस्ट ऑफिस PPF योजनेचा लॉक-इन कालावधी 15 वर्षांचा आहे. या योजनेत किमान 500 रुपयांपासून खाते सुरू करता येते. एका आर्थिक वर्षात जास्तीत जास्त 1.5 लाख रुपये गुंतवता येतात. 15 वर्षांचा कालावधी पूर्ण झाल्यानंतर ही योजना पुढील 5 वर्ष वाढवण्याचीही सुविधा आहे.
जर तुम्ही दरवर्षी PPF मध्ये जास्तीत जास्त 1.5 लाख रुपये गुंतवले, तर दरमहा सुमारे 12,500 रुपये गुंतवणूक करावी लागते. अशी 15 वर्षे नियमितपणे गुंतवणूक केल्यास, एकूण जमा रक्कम 22.5 लाख रुपये होते. सरकारकडून मिळणाऱ्या 7.1 टक्के व्याजामुळे यावर सुमारे 18.18 लाख रुपयांचे व्याज मिळते. त्यामुळे 15 वर्षांनंतर मॅच्युरिटीवेळी तुम्हाला सुमारे 40.68 लाख रुपये मिळू शकतात.
PPF खाते कोणत्याही जवळच्या पोस्ट ऑफिसमध्ये किंवा बँकेत उघडता येते. या योजनेत कर्जाची सुविधा देखील आहे. खाते उघडल्यानंतर काही वर्षांनी तुम्ही कर्जासाठी अर्ज करू शकता. तसेच, खाते उघडल्याच्या पाच वर्षांनंतर काही प्रमाणात पैसे काढण्याची सुविधाही उपलब्ध असते.