Gold Silver Price Today: सोन्या-चांदीच्या दरात आज, 10 सप्टेंबर रोजी संमिश्र हालचाल पाहायला मिळत आहे. मल्टी कमोडिटी एक्स्चेंजवर (MCX) चांदीच्या दरात घसरण झाली असून, सोने मात्र किंचित महागले आहे. त्यामुळे आज सोने खरेदी करणाऱ्या ग्राहकांसाठी दरवाढीचा, तर चांदी खरेदी करणाऱ्यांसाठी काहीसा दिलासादायक दिवस आहे.
MCX वर चांदीचा भाव 1,217 रुपयांनी घसरून 2,42,996 रुपये प्रति किलो झाला आहे. दुसरीकडे, सोन्याच्या दरात 90 रुपयांची वाढ होऊन तो 1,55,213 रुपये या पातळीवर व्यवहार करत आहे. आगामी काळात अमेरिकेतील महागाईची आकडेवारी आणि फेडरल रिझर्व्हच्या व्याजदरांबाबतच्या निर्णयाचा सोन्या-चांदीच्या किमतीवर मोठा परिणाम होण्याची शक्यता आहे.
देशातील प्रमुख शहरांमध्ये सोन्याच्या दरात किरकोळ फरक पाहायला मिळत आहे. 24 कॅरेट सोन्याचा दर दिल्ली आणि लखनऊमध्ये सुमारे 1,54,450 रुपये प्रति 10 ग्रॅम आहे. तर मुंबई, कोलकाता, बंगळुरू पुणे आणि हैदराबादमध्ये 24 कॅरेट सोन्याचा भाव सुमारे 1,54,300 रुपये प्रति 10 ग्रॅम आहे.
22 कॅरेट सोन्याचा दर बहुतांश शहरांमध्ये 1,41,440 ते 1,41,590 रुपये प्रति 10 ग्रॅम दरम्यान आहे. दागिने खरेदी करणाऱ्या ग्राहकांसाठी 22 कॅरेट सोन्याला मोठी मागणी असते. तर 18 कॅरेट सोन्याचा दर तुलनेने कमी असून, बहुतांश शहरांमध्ये तो 1,15,720 ते 1,15,870 रुपये प्रति 10 ग्रॅम दरम्यान आहे.
सोन्याच्या तुलनेत आज चांदीच्या दरात घसरण दिसून आली आहे. मागील सहा दिवस चांदीचे दर स्थिर राहिल्यानंतर आज दिल्लीत चांदीच्या भावात 100 रुपयांची घट झाली आहे. त्यामुळे एका किलो चांदीचा दर 2,49,900 रुपये झाला आहे.
महिन्याच्या सुरुवातीला चांदीच्या दरात मोठी अस्थिरता पाहायला मिळाली होती. 1 आणि 2 सप्टेंबर रोजी चांदीच्या दरात दररोज 5,000 रुपयांची घसरण झाली होती. त्यानंतर 3 सप्टेंबर रोजी चांदी पुन्हा 5,000 रुपयांनी महागली.
आता सोन्या-चांदीच्या बाजारातील गुंतवणूकदारांचे लक्ष अमेरिकेतील आर्थिक आकडेवारीकडे लागले आहे. रॉयटर्सच्या सर्वेक्षणानुसार, बहुतांश अर्थतज्ज्ञांना अमेरिकेची फेडरल रिझर्व्ह 15-16 सप्टेंबरच्या बैठकीत व्याजदरात कोणताही बदल करणार नाही, असे वाटते.
यंदाही व्याजदर स्थिर राहण्याची शक्यता व्यक्त केली जात असली, तरी पुढील काळात फेडरल रिझर्व्हची भूमिका काय असेल, याबाबत अनिश्चितता कायम आहे. त्यामुळे सप्टेंबरमधील फेडची बैठक सोन्यात गुंतवणूक करणाऱ्यांसाठी महत्त्वाची ठरणार आहे.
याशिवाय अमेरिकेचा प्रोड्यूसर प्राइस इंडेक्स (PPI) आणि कंझ्युमर प्राइस इंडेक्स (CPI) यांसारख्या महागाईच्या आकडेवारीकडेही बाजाराचे लक्ष आहे. या आकडेवारीवरून फेडरल रिझर्व्हच्या आगामी व्याजदर धोरणाचा अंदाज येऊ शकतो.
अमेरिकेतील महागाई अपेक्षेपेक्षा कमी राहिल्यास व्याजदर कपातीच्या शक्यतेला बळ मिळू शकते आणि त्याचा परिणाम सोन्या-चांदीच्या दरावर होऊ शकतो. त्यामुळे पुढील काही दिवस अत्यंत महत्त्वाचे ठरणार आहेत.