Disney Layoffs: जगप्रसिद्ध मनोरंजन कंपनी डिस्ने पुन्हा एकदा मोठ्या प्रमाणावर नोकरकपात करण्याच्या तयारीत आहे. कंपनी हजारो कर्मचाऱ्यांना कामावरून कमी करण्याचा विचार करत असल्याची माहिती समोर आली आहे. ब्लूमबर्ग न्यूजने दिलेल्या वृत्तानुसार, कंपनीने काही वरिष्ठ व्यवस्थापकांना वार्षिक खर्चात तब्बल २० टक्के कपात करण्याचे उद्दिष्ट दिले आहे. या खर्चकपातीसाठी कोणत्या विभागात किती बचत करता येईल, याचा आराखडा तयार करण्याच्या सूचना व्यवस्थापकांना देण्यात आल्या आहेत.
डिस्ने सध्या अनेक आव्हानांचा सामना करत आहे. कंपनीचे मुख्य कार्यकारी अधिकारी (CEO) जोश डी'अमारो यांच्यासमोर व्यवसाय अधिक फायदेशीर बनवण्याचे मोठे आव्हान आहे. कृत्रिम बुद्धिमत्तेचा (AI) वाढता वापर, ऑनलाइन मनोरंजन क्षेत्रातील वाढती स्पर्धा आणि चित्रपटांच्या कमाईतील घट यामुळे कंपनीवर दबाव वाढला आहे. त्याचबरोबर डिस्नेच्या प्रसिद्ध थीम पार्कमध्ये येणाऱ्या परदेशी पर्यटकांच्या संख्येतही घसरण होत आहे.
डिस्नेच्या या निर्णयाचा परिणाम कंपनीच्या सर्व विभागांवर सारखाच होणार नाही. काही विभागांमध्ये मोठ्या प्रमाणात खर्च कमी केला जाऊ शकतो. मात्र, या कपातीतून वाचणारा संपूर्ण पैसा कंपनीकडे राखून ठेवला जाणार नाही. त्यातील काही रक्कम पुन्हा व्यवसायाच्या महत्त्वाच्या क्षेत्रांमध्ये गुंतवली जाणार आहे.
नवीन तंत्रज्ञान, चित्रपट आणि टीव्ही कार्यक्रमांची निर्मिती, थीम पार्क तसेच क्रूझ जहाजांच्या व्यवसायाला अधिक बळ देण्याची डी'अमारो यांची योजना आहे. बदलत्या मनोरंजन क्षेत्रात स्पर्धेत टिकून राहण्यासाठी या क्षेत्रांवर भर दिला जाणार आहे.
डिस्नेने गेल्या काही वर्षांत सातत्याने कर्मचारीसंख्या कमी केली आहे. आर्थिक वर्ष २०२५ च्या अखेरीस कंपनीत सुमारे २ लाख ३१ हजार कर्मचारी कार्यरत होते.
मिळालेल्या माहितीनुसार, सप्टेंबरमध्ये कंपनीने व्यवस्थापन आणि तंत्रज्ञान विभागातील काहीशे कर्मचाऱ्यांना कामावरून कमी केले होते. याआधी एप्रिलमध्ये सुमारे एक हजार कर्मचाऱ्यांना कमी केले होते. २०२५ मध्येही वेगवेगळ्या टप्प्यांत काहीशे कर्मचाऱ्यांची कपात करण्यात आली होती.
२०२३ मध्ये तत्कालीन मुख्य कार्यकारी अधिकारी बॉब आयगर यांनी कंपनीत मोठी पुनर्रचना करत तब्बल ७ हजार कर्मचाऱ्यांना कामावरून कमी केले होते. या निर्णयातून कंपनीने सुमारे ५.५ अब्ज डॉलर खर्च वाचवण्याचे उद्दिष्ट ठेवले होते.
केवळ डिस्नेच नव्हे, तर मनोरंजन क्षेत्रातील इतर कंपन्याही खर्च कमी करण्यासाठी कर्मचारी कपात करत आहेत. नेटफ्लिक्स आणि स्कायडान्स यांसारख्या कंपन्यांनीही अलीकडे नोकरकपातीचे निर्णय घेतले आहेत.
डिजिटल मनोरंजन, कृत्रिम बुद्धिमत्ता आणि बदलती ग्राहकांची आवड यामुळे या क्षेत्रातील स्पर्धा अधिक तीव्र झाली आहे. अशा परिस्थितीत खर्च कमी करून व्यवसाय अधिक फायदेशीर बनवण्याचा कंपन्यांचा प्रयत्न आहे.
डिस्नेच्या आगामी नोकरकपातीचा नेमका आकडा अद्याप स्पष्ट झालेला नाही. मात्र, हजारो कर्मचाऱ्यांच्या नोकऱ्यांवर टांगती तलवार असल्याने कंपनीतील कर्मचाऱ्यांमध्ये चिंतेचे वातावरण आहे.