डिजिटल वैयक्तिक माहिती संरक्षण विधेयक २०२२ चा मसुदा तयार : आयटी मंत्रालयाने नागरिकांकडून मागविल्या सूचना

नवी दिल्ली, पुढारी वृत्तसेवा : डिजिटल वैयक्तिक माहिती तसेच माहिती गोपनीयतेच्या सुरक्षेबाबत विविध पैलूंवर केंद्र सरकार विचारविनिमय करीत आहे. याअनुषंगाने इलेक्ट्रॉनिक्स आणि माहिती तंत्रज्ञान मंत्रालयाने (आयटी) डिजिटल वैयक्तिक माहिती गोपनीयता संरक्षण विधेयक-२०२२ चा मसुदा तयार केला आहे. या मसुद्यावर मंत्रालयाने १७ डिसेंबरपर्यंत नागरिकांकडून अभिप्राय आणि सूचना मागवल्या आहेत.

नागरिकांची वैयक्तिक माहिती गोपनीय राखण्याचा अधिकार अबाधित राखून कायदेशीर बाबी तसेच या अनुषंगाने येणाऱ्या इतर बाबींसाठी त्यांची वैयक्तिक माहिती उपलब्ध करुन देता यावी, या उद्देशाने हे विधेयक तयार करण्यात येत असल्याचे मंत्रालयाने स्पष्ट केले आहे.

भारतात डिजिटल वैयक्तिक माहिती सुरक्षेचे नियमन करण्यासाठी, हे विधेयक कायद्याची चौकट उपलब्ध करेल. नागरिकांची वैयक्तिक माहिती सुरक्षितपणे जपण्याचा अधिकार तसेच सामाजिक अधिकार अबाधित राखणे आणि कायदेशीर बाबींसाठी ही वैयक्तिक माहिती वापरण्याच्या दृष्टीने प्रक्रिया करण्याची आवश्यकता म्हणून हे विधेयक अस्तित्वात येईल, अशी माहिती मंत्रालयाने दिली आहे.