दापोली; पुढारी वृत्तसेवा: दापोलीचे आमदार योगेश कदम यांचे बंडाला समर्थन देणाऱ्या पदाधिकाऱ्यांना पदावरून हटवून नवीन नियुक्त्या केल्या जात आहे. दापोली शहराचे शहर युवा अधिकारी स्वप्नील ( बाबू) पारकर यांना हटवून त्यांचे जागी प्रसाद दरीपकर यांची शहर युवा अधिकारी म्हणून नियुक्ती करण्यात आली आहे. त्यामुळे दापोली शहरासाठी शिवसेना पक्ष प्रमुख उद्धव ठाकरे यांनी दिलेला मोठा झटका म्हणावा लागेल.
शिवसेनेचे बंडखोर नेते एकनाथ शिंदे यांच्या बंडात दापोलीचे आमदार योगेश कदम हे सामील झाल्यानंतर दापोलीत समर्थकांनी योगेश कदम यांना समर्थन देण्यासाठी बैठकांचा सिलसीला सुरू केला. याची थेट दखल ही मतोश्रीने घेतली असून, प्रथमतः शहरातील पदाधिकारी हटविण्यास पक्ष प्रमुखांनी सुरवात केली आहे. दापोलीतील योगेश कदम समर्थक पदाधिकारी हटाव मोहिमेबरोबर युवा सेनेच्या उत्तर रत्नागिरीतील पदाधिकाऱ्यांना देखील पदावरून हटविण्यात आले आहे.
उत्तर रत्नागिरी उपजिल्हा युवा अधिकारी दर्शन महाजन ( दापोली विधानसभा), जिल्हा सचिव राकेश सागवेकर, (खेड), तालुका युवा अधिकारी मच्छिंद्र गोवळकर, (खेड तालुका ), शहर युवा अधिकारी, प्रसाद पाटणे, (खेड शहर) शहर युवा अधिकारी, प्रसाद दरीपकर,( दापोली शहर ) यांच्या नियुक्त्या करण्यात युवा सेनेच्या पदावर करण्यात आल्या आहेत.
शिवसेना पक्षप्रमुख उद्धव ठाकरे यांच्या मार्गदर्शनाने शिवसेना नेते युवासेना प्रमुख आदित्य ठाकरे यांनी उत्तर रत्नागिरी जिल्ह्यामधील युवा सेना पदाधिकाऱ्यांच्या नियुक्त्या जाहीर केल्या आहेत. या नियुक्त्या तात्पुरत्या स्वरूपातील असून सहा महिन्यांनंतर पदाधिकाऱ्यांचे काम बघून कायम करण्यात येतील, असे युवा सेनेच्या मध्यवर्ती कार्यालयातून प्रसिद्ध करण्यात आलेल्या प्रसिद्धी पत्रकात म्हटले आहे.
हेही वाचलंत का?