बेळगाव : महिलांना आर्थिकदृष्ट्या सक्षम करण्यासाठी आम्ही गृहलक्ष्मी योजना सुरु केली आहे. ही योजना देशात आदर्श ठरली आहे, असे महिला व बालविकास मंत्री लक्ष्मी हेब्बाळकर सांगत असतानाच महिलांना तीन महिन्याचे पैसे का देण्यात आली नाही, असा सवाल भाजप आमदारांनी केला. त्यावर महाराष्ट्रात लाडकी बहीण योजनेचे काय झाले, असे हेब्बाळकर यांनी विचारताच सभागृहात वादावादी झाली.
गृहलक्ष्मी योजनेवरुन मंगळवारी (दि. 9) सायंकाळी विधानसभेत काँग्रेस-भाजपमध्ये खडाजंगी झाली. गृहलक्ष्मी योजनेची रक्कम विविध जिल्ह्यात वेळेत मिळत नाही. याकडे भाजपचे महेश टेंगिनकाई यांनी महिला व बालविकास मंत्री हेब्बाळकर यांचे लक्ष वेधले. त्यावेळी दोन्ही पक्षांच्या नेत्यांमध्ये खडाजंगी झाली.
गृहलक्ष्मी योजनेची रक्कम गेल्या तीन महिन्यात लाभार्थी महिलांना पोचली नाही. इतकेच नाही तर यंदा फेब्रुवारी व मार्चची रक्कमही मिळालेली नाही. ती का दिली नाही, असा प्रश्न भाजप आमदार? ? टेंगिनकाई यांनी उपस्थित केला. ऑगस्टपर्यंतचे सर्व हप्ते थेट लाभार्थी महिलांच्या खात्यात जमा केले आहेत, असे मंत्री हेब्बाळकर यांनी स्पष्ट केले.
ऑगस्टपर्यंतची रक्कम जमा झाली आहे तर फेब्रुवारी व मार्च या दोन महिन्यांची का जमा झाली नाही, असा प्रश्न टेंगिनकाई यांनी उपस्थित केला. त्यामुळे, संतप्त झालेल्या हेब्बाळकर यांनी महाराष्ट्रात लाडकी बहीण योजनेचे काय झाले, असा प्रतिप्रश्न केला. यावरुन भाजपचे आमदारही संतप्त झाले. आम्ही कर्नाटकच्या सभागृहात आहोत. महाराष्ट्राचा विषय कुठून आला, असा उलट प्रश्न त्यांनी विचारला. भाजपचे आमदार सुनीलकुमार यांच्यासह इतर आमदारांनीही त्याला आक्षेप घेतला.