मांडवगण फराटा, पुढारी वृत्तसेवा: सादलगाव (ता. शिरूर) येथे वीज पडून १६ वर्षीय ऊसतोडणी मजूर तरुणीचा मृत्यू झाला. रिता सिताराम नाईक (मूळ रा. आडशी, ता. जि. नंदूरबार) असे मृत तरुणीचे नाव आहे. या तरुणीची विवाहित बहीण गीता राजेश वळवी ही यामध्ये जखमी झाली आहे. तिच्यावर मांडवगण फराटा येथील खासगी रुग्णालयात उपचार सुरू आहेत.
सादलगाव शिवारात बुधवारी २८ सप्टेंबर रोजी दुपारी दोन वाजण्याच्या सुमारास ही घटना घडली. उसाच्या शेतात ऊस तोडणी सुरू असताना पाऊस सुरू झाला होता. पाऊस पडत असताना या दोघी बहिणी ऊसाच्या फडातून ट्रॅक्टर कसा येईना, हे पाहण्यासाठी रस्त्यावर आल्या होत्या. यावेळी या दोघींवर वीज पडली. यात रीता व गीता या दोघी बहिणी बेशुद्ध पडल्या. त्यांना तातडीने उपचारासाठी मांडवगण फराटा येथील प्राथमिक आरोग्य केंद्रात आणले असता वैद्यकीय अधिकारी डॉ. मंजुषा सातपुते-इसवे यांनी रीताला मृत घोषित केले तर बेशुद्धावस्थेतील गीता हीला उपचारासाठी खासगी दवाखान्यात पाठवले. गीता हीची प्रकृती गंभीर असल्याचे वरद विनायक हॉस्पिटलचे संचालक डॉ. सुनील पवार यांनी सांगितले. मृत रीता हीचा मृतदेह उत्तरीय तपासणीसाठी न्हावरे येथील ग्रामीण रुग्णालयात पाठविण्यात आला आहे.
