कीव्ह/ मॉस्को : जगातील अमेरिकेचा दबदबा संपला असल्याची टीका रशियाचे राष्ट्राध्यक्ष व्लादिमीर पुतिन यांनी केली आहे. अमेरिकेच्या आमिषाला बळी पडून मित्र देशांनी रशियाच्या विरोधात कोणतीही पावले उचलल्यास त्याचे गंभीर परिणाम भोगावे लागतील. अमेरिका स्वतःला 'मॅसेंजर ऑल गॉड' समजत असून, प्रत्यक्षात मात्र अमेरिका आपल्या देशांशी गुलामाप्रमाणे वागत असल्याचे पुतिन म्हणाले.
एका कार्यक्रमात बोलताना पुतिन म्हणाले, अमेरिका आता पहिल्यासारखा शक्तिशाली देश राहिलेला नाही. आपल्या मित्र देशांना गुलामासारखी वागणूक देत आहे हे खेदजनक आहे.
अमेरिकेचा दबदबा कमी झाला असल्याचे आता मित्र देशांनी समजावून घ्यावे. तुम्ही इतरांना नेहमीच कमजोर आणि गुलाम समजत असाल तर एक दिवस त्याची किंमत चुकवावीच लागते आणि हेच आता अमेरिकेबाबत होत आहे. यावेळी पुतिन यांनी एकदाही रशिया आणि युक्रेन युद्धाबाबत भाष्य केले नाही. मात्र, पाश्चिमात्य देशांनी रशियावर टाकलेले आर्थिक निर्बंध आणि देशाच्या अर्थव्यवस्थेवर पुतिन यांनी यावेळी भाष्य केले.
जॉन्सन यांनी घेतली झेलेन्स्की यांची भेट
संसदेत अविश्वास ठराव फेटाळून लावल्यानंतर ब्रिटनचे पंतप्रधान बोरिस जॉन्सन सध्या खूपच उत्साहात आहेत. शुक्रवारी त्यांनी अचानक युक्रेनचे राष्ट्राध्यक्ष झेलेन्स्की यांची कीव्हमध्ये भेट घेतली. युक्रेनला ब्रिटन आणि नाटोे सर्वतोपरी मदत करणार असल्याचे आश्वास जॉन्सन यांनी यावेळी दिले. ब्रिटिश लष्कर युक्रेनच्या दहा हजार सैनिकांना प्रशिक्षण देणार असून, वैद्यकीय सेवा नव्याने विकसित करणार असल्याचे जॉन्सन म्हणाले.
