मुंबई ; पुढारी वृत्तसेवा : प्रार्थनेसाठी चर्चमध्ये येत असलेल्या अल्पवयीन मुलावर अनैसर्गिक लैंगिक अत्याचार करणार्या 52 वर्षीय फादरला विशेष सत्र न्यायालयाने आजन्म कारावासाची शिक्षा सुनावली आहे. गोवंडीतील शिवाजीनगरमध्ये नोव्हेंबर 2015 मध्ये ही धक्कादायक घटना घडली होती.
फादरविरोधात विशेष सत्र न्यायालयाच्या न्या. सीमा जाधव यांच्या न्यायालयात खटला चालला. यावेळी विशेष सरकारी वकील वीणा शेलार यांनी सरकारतर्फे युक्तिवाद करत एकूण 9 साक्षीदार तपासले. तसेच, मुलावर अत्याचार झाल्यानंतरची त्याच्या वैद्यकीय तपासणी, उपचारांची कागदपत्रे आणि अन्य सबळ पुराव्यांच्या आधारे फादरला आजन्म कारावासाच्या शिक्षेची मागणी त्यांनी न्यायालयात केली. न्यायालयाने ही मागणी मान्य करत आरोपी फादरला आजन्म कारावासाची शिक्षा सुनावली आहे.
काय होते प्रकरण..
गोवंडीमध्ये कुटुंबासोबत रहात असलेला 13 वर्षीय पीडित मुलगा सातवी इयत्तेत शिकत होता. तो चर्चमध्ये नियमित प्रार्थनेला जायचा. याच दरम्यान फादरची त्याच्यावर वाईट नजर पडली. ऑगस्ट 2015 मध्ये फादरने या मुलावर अनैसर्गिक लैंगिक अत्याचार केला. त्यानंतर मुलगा आजारी पडला. कुटूंबियांनी त्याला उपचारांसाठी सुरुवातीला शताब्दी रुग्णालयात आणि त्यानंतर कस्तुरबा रुग्णालयात दाखल केलेे. मुलाला उपचारानंतर घरी आणले तरीसूद्धा तो आपल्यासोबत घडलेल्या अत्याचारांबाबत बोलत नव्हता.
मुलाच्या वागण्यात झालेला बदल. तो प्रार्थनेला चर्चमध्ये जात नाही. यामुळे आई-वडील चिंतेत होते. अशातच त्यांनी 27 नोव्हेंबरला पून्हा मुलाला प्रार्थनेसाठी चर्चमध्ये पाठविले. यावेळीही फादरने त्याच्यावर अनैसर्गिक लैंगिक अत्याचार केला. मुलगा प्रचंड तणावाखाली जाऊन घरी परतला. अखेर आई-वडिलांनी त्याच्याकडे विचारपूस केली असता मुलाने फादरने आपल्यासोबत केलेल्या कृत्याला वाचा फोडली.
मुलासोबत घडलेला हा प्रकार ऐकून आई-वडील हादरले. अखेर त्यांनी मुलाला सोबत घेऊन शिवाजीनगर पोलीस ठाण्यात जात तक्रार दिली. या तक्रारीवरुन पोलिसांनी पोक्सो कायद्यान्वये गुन्हा दाखल करुन फादरला अटक केली. गेली सहा वर्षे हा फादर कारागृहात न्यायबंदी होता.
