नवी दिल्ली ; पुढारी वृत्तसेवा : विध क्षेत्रांत उल्लेखनीय कार्य करणार्या एकूण 28 महिलांना 'नारीशक्ती' पुरस्कार सोमवारी जाहीर करण्यात आला. महाराष्ट्रातील तीन महिलांचा यामध्ये समावेश आहे. हे पुरस्कार वर्ष 2020 व 2021 साठीचे आहेत.
आंतरराष्ट्रीय महिला दिनाचे औचित्य साधून सोमवारी केंद्रीय महिला व बालकल्याण मंत्रालयाच्या वतीने 'नारीशक्ती' पुरस्काराची घोषणा केली आहे. यामध्ये डाऊन सिंड्रोम या विकाराने ग्रस्त कथ्थक नृत्यांगना सायली आगवणे (पुणे), विनिता बोराडे (बुलडाणा) या पहिल्या महिला सर्पमित्र यांना वर्ष 2020 साठीचा, तर वर्ष 2021 साठी सामाजिक उद्योजिका कमल कुंभार (उस्मानाबाद) यांना हा पुरस्कार जाहीर झाला आहे.
मंगळवारी आंतरराष्ट्रीय महिला दिनाच्या दिवशी राष्ट्रपती रामनाथ कोविंद यांच्या हस्ते राष्ट्रपती भवन येथे आयोजित कार्यक्रमात विविध क्षेत्रांत उत्तुंग कामगिरी केलेल्या 29 महिला व महिलांसाठीच्या संस्थांना हा पुरस्कार प्रदान केला जाणार आहे. कोरोनामुळे वर्ष 2020 च्या पुरस्कारांचे वितरण होऊ शकले नव्हते. 8 मार्चला वर्ष 2020 आणि 2021 च्या पुरस्कारांचे वितरण होणार आहेत. कार्यक्रमात पंतप्रधान नरेंद्र मोदी, केंद्रीय महिला व बालकल्याणमंत्री तसेच अन्य मंत्री, वरिष्ठ अधिकारी उपस्थित राहतील. या कार्यक्रमामध्ये एकूण 28 पुरस्कार (वर्ष 2020 आणि 2021 साठी प्रत्येकी 14) एक पुरस्कार संयुक्तपणे दोन महिलांना देण्यात येणार आहे.
2020 च्या नारीशक्ती पुरस्कार विजेत्यांमध्ये उद्योजकता, कृषी, नवकल्पना उपक्रम, सामाजिक कार्य, कला आणि हस्तकला, एसटीईएमएम आणि वन्यजीव संवर्धन अशा विविध क्षेत्रांमध्ये कार्यरत असलेल्या महिलांचा समावेश आहे. तसेच 2021 च्या नारीशक्ती पुरस्कार विजेत्या महिलांमध्ये भाषाशास्त्र, उद्योजकता, कृषी, सामाजिक कार्य, कला आणि हस्तकला, मर्चंट नेव्ही, एसटीईएमएम, शिक्षण आणि साहित्य, दिव्यांग अधिकारासाठी कार्य करणार्या महिलांचा समावेश आहे.
