मुंबई ; पुढारी डेस्क : सक्तवसुली संचालनालय अर्थात ईडीच्या कोठडीत असलेले राज्याचे अल्पसंख्याक विकास मंत्री नवाब मलिक यांचा मुलगा फराज याला लवकरच चौकशीचे समन्स पाठवले जाऊ शकते. कुख्यात अंडरवर्ल्ड डॉन दाऊद इब्राहिम आणि त्याच्या सहकार्यांमार्फत झालेल्या हवाला प्रकरणात ईडीकडून प्रश्न विचारले जाण्याची शक्यता आहे.
दरम्यान, प्रकृतीच्या कारणावरून नवाब मलिक जेजे रुग्णालयात दाखल आहेत. त्यांचा अहवाल आल्यानंतर ईडीचे अधिकारी मुंबईतील खासगी डॉक्टर्स आणि एम्सच्या तज्ज्ञांशी चर्चा करून पुढील कारवाईचे स्वरूप ठरवणार आहेत. सूत्रांच्या माहितीनुसार ईडीच्या चौकशीला मलिक सहकार्य करत नाहीत. जेजे रुग्णालयात मलिक यांना जेथे ठेवण्यात आले आहे तेथे सीआरपीएफचे जवान तैनात आहेत. मलिक यांना कुणालाही भेटण्यास परवानगी नाही.
दाऊद इब्राहिमच्या बहिणीला कुर्ला येथे मालमत्ता बळकावण्यासाठी मदत करणे आणि नंतर ती खरेदी करणे या आरोपाखाली मलिक यांना बुधवारी ईडीकडून अटक करण्यात आली होती. यातील पैसा हवालामार्फत टेरर फंडिंगसाठी वापरण्यात आल्याचा आरोप ईडीने ठेवला आहे. मलिक यांना 3 मार्चपर्यंत ईडीच्या कोठडीत ठेवण्याचे आदेश पीएमएलए कोर्टाने दिले होते. शुक्रवारी मलिक यांच्या प्रकृतीची तपासणी करण्यासाठी त्यांना जेजे रुग्णालयात नेण्यात आले होते. तेथे त्यांच्या पोटात दुखू लागल्यामुळे जेजेमध्येच ठेवण्याचा सल्ला डॉक्टरांनी दिला होता.
दाऊदची बहीण हसीना पारकर हिच्याकडून कुर्ला येथील मालमत्ता मलिक यांनी बेकायदेशीरपणे खरेदी केली. या खरेदीमध्ये त्यांचा मुलगा फराज हा सहभागी होता. कागदपत्रे आणि पैशांची व्यवस्था करण्यात फराजने पुढाकार घेतला होता, असा आरोप ईडीने ठेवला आहे. या संदर्भातच त्याला चौकशीसाठी बोलावले जाऊ शकते.
तत्पूर्वी मलिक यांचा भाऊ इक्बाल यांच्यासोबत काम करत असलेल्या अहमदुल्ला अन्सारी याची जबानी ईडीने घेतली. अन्सारी आणि फराज यांनी दक्षिण मुंबईतील हसीना पारकर असोसिएट्सच्या कार्यालयाला भेट दिली होती. यावेळी फराज याने 50 लाखांची रोख रक्कम आणि 5 लाख रुपयांचा चेक हसीना पारकर हिच्या हातात दिला होता. यावेळी हसीना पारकरचा निकटवर्तीय सलीम पटेल उपस्थित होता, असे ईडीचे म्हणणे आहे.
