मेरठ; वृत्तसंस्था : नमन नावाच्या एका दिवट्याने गर्लफ्रेंडला खूश करण्यासाठी चक्क आपल्याच घरात डल्ला मारला. उत्तर प्रदेशातील मेरठमध्ये ही घटना घडली. नमनला त्याच्या मित्रांनी या गैरकृत्यात साथ दिली. आई-वडिलांना बांधून ठेवले आणि रोख रकमेसह दागिने लुटले. पोलिसांना गुंगारा देण्यासाठी मोबाईल कॉल, मेसेज व चॅट हिस्ट्री डिलिट केल्यावरही पोलिसांनी गुगल बॅकअपच्या मदतीने सर्व हिस्ट्री बाहेर काढली आणि या दिवट्याच्या मुसक्या आवळल्या.
चिंटू सैनी, शिवम सैनी, शिवम गिल या मित्रांना नमनने मोबाईल कॉल, मेसेंजर व व्हॉटस्अॅपच्या माध्यमातून घरात पैसे कुठे ठेवलेले आहेत, याची माहिती दिली. ठरल्यानुसार मध्यरात्रीनंतर अडीचच्या सुमारास नमननेच दरवाजा उघडला आणि चोरट्या मित्रांना वेलकम केले. तिजोरीचे लोकेशन सांगितले. नंतर या मित्रांनी नमनच्या आई-वडिलांना बांधून ठेवले. 14 लाखांची रोकड व दागिने घेऊन पोबारा केला. सर्वांनी चेहर्यावर रुमाल गुंडाळलेले होते. त्यामुळे त्यांची ओळख पटली नाही.
