शिरोली एमआयडीसी ; पुढारी वृत्तसेवा : कागल पंचतारांकित औद्योगिक वसाहतीमधील न्यू मेल्टिंग सेंटर प्रा. लि. या कंपनीला माल पुरवठा करताना वजनात फेरफार करून 6 कोटी 97 लाख रुपयांना गंडा घालण्यात आला. या प्रकरणी तेथीलच श्री स्वामी समर्थ वे ब्रिजवर पोलिसांनी छापा टाकला असता यामध्ये वजन काट्यात फेरफार केल्याचे आढळून आले. त्यामुळे पोलिसांत गुन्हा दाखल करण्यात येणार असल्याची माहिती न्यू मेल्टिंग कंपनीचे संचालक अबुबकर दिलावर शेख यांनी दिली.
या प्रकरणी गोकुळ शिरगाव पोलिस ठाण्यात गुन्हा नोंद झाला आहे. अबुबकर दिलावर शेख (रा. वाय. पी. पोवारनगर, कोल्हापूर) यांच्या न्यू मेल्टिंग सेंटर या कंपनीस अब्दुल गफार सिद्दीक कच्छी, अमीर अब्दुल गफार कच्छी (दोघेही रा. ताराबाई पार्क, कोल्हापूर), आनंदा बाळू शिंदे (रा. कुशिरे, ता. पन्हाळा), परशुराम बापू गायकवाड व गणेश परशुराम गायकवाड (दोघे रा. पेठवडगाव, ता. हातकणंगले), पांडुरंग कुंभार (रा. राधानगरी) हे सहाजण कच्च्या मालाचा पुरवठा करीत होते.
त्यांनी 2021 व 2022 या दोन आर्थिक वर्षांत श्री साई समर्थ वे ब्रिजचे मालक तुषार अशोक सूर्यवंशी (रा. गोकुळ शिरगाव) व महात वे ब्रिजचे वसीन अक्रम महात यांंच्याशी संगनमत साधले. त्यांनी वजन काट्यामध्ये बदल करून वेळोवेळी कास्ट आयर्न बोरिंग मालपुरवठ्यामध्ये अपहार केल्याचे फिर्यादित म्हटले आहे.
दरम्यान, लेखापरीक्षण अहवालात 6 कोटी 97 लाख रुपयांच्या एकूण 1 हजार 700 टन मालाचा कमी पुरवठा झाल्याचे कंपनीच्या निदर्शनात आल्यानंतर वरील सहा पुरवठादार व दोन वजन काट्यांचे मालक अशा आठ जणांविरुद्ध 13 जुलै रोजी गोकुळ शिरगाव पोलिस ठाण्यात गुन्हा नोंद करण्यात आला.
त्यावेळी वजन काट्यांवर चौकशी केली असता वजन काट्यात कोणताही फेरफार करता येत नसल्याचे सांगण्यात आले होते. मात्र 21 ऑगस्ट रोजी गोकुळ शिरगाव पोलिस स्टेशनचे सहायक पोलिस निरीक्षक अविनाश माने यांच्यासह पथकाने श्री स्वामी समर्थ वे ब्रिज या वजन काट्यावर छापा टाकला असता वजन काटा मॅनेज करता येत असल्याचे संगणक कर्मचार्यांने स्पष्टपणे कबुल केले. व्हिडिओमध्ये पण स्पष्टपणे दिसून येते. त्यामुळे पोलिस त्या वजन काटा मालकावर गुन्हा दाखल करणार असल्याचे न्यू मेल्टिंग कंपनीचे मालक अबुबकर शेख यांनी दिली आहे.
