कोल्हापूर; पुढारी वृत्तसेवा : शाहू महाराज यांच्या 75 व्या वाढदिवसानिमित्त राजर्षी शाहू खासबाग मैदानात कुस्ती मैदान भरणार आहे. शनिवारी (दि. 7) होणार्या मैदानासाठी शाहू खासबाग सज्ज करण्यात आले आहे. प्रशासक डॉ. कादंबरी बलकवडे यांनी माजी खा. संभाजीराजे यांच्यासमवेत बुधवारी सायंकाळी कुस्ती मैदानाची पाहणी केली.
प्रशासक डॉ. बलकवडे यांच्या सूचनेनुसार या ठिकाणचा परिसर स्वच्छ करण्यात आला असून केशवराव भोसले नाट्यगृह पश्चिम बाजूच्या संरक्षण भिंतीला तडे गेले होते त्या ठिकाणी दर्जा भरून घेण्यात आल्या आहेत. मैदानाच्या आखाड्यामध्ये नवीन माती टाकणे ती पसरणे व ग्रील बाजूस मातीची पोती भरून ठेवण्यात आली आहेत. मैदानाच्या दक्षिण बाजू व पश्चिम बाजूस संरक्षण भिंती लगत मुरूम पसरणे व ज्या ठिकाणी बाजू खचली होती ती लेव्हल करून घेण्यात आली आहे. मैदानावरील राजर्षी छत्रपती शाहू खासबाग कुस्त्यांचे मैदान हा बोर्ड कलर करून घेण्यात आला आहे. कुस्ती झाल्यानंतर पैलवानांसाठी अंघोळीच्या सोयीसाठी शॉवर व प्लॅटफॉर्म तयार करण्याचे काम सुरू आहे.
अल्लादियाँ खाँ साहेब यांच्या पुतळ्या जवळील ग्रील दुरुस्ती, शोभेची झाडे व रंगरंगोटी करण्याचे काम करण्यात आले आहे. मैदान पश्चिम बाजू गेट कमान बाजूस विटेचे बांधकाम करून वहिवाट बंद करण्याचे काम चालू आहे.
केशवराव भोसले नाट्यगृह उत्तर बाजू गेट जवळ मुरूम टाकून लेवल व रॅम्पला काँक्रीट करण्यात आले आहे. मैदान दक्षिण बाजूस निखळलेला दगड बसवण्यात आला आहे. व्हीआयपी सूटमध्ये नवीन कोच ठेवण्यात आला आहे. यावेळी उपायुक्त रविकांत आडसूळ, उपशहर अभियंता नारायण भोसले, मुख्य लेखापाल संजय सरनाईक, माजी उपमहापौर अर्जुन माने, माजी स्थायी समिती सभापती शारंगधर देशमुख, पशु वैद्यकीय अधिकारी डॉ. विजय पाटील, इस्टेट ऑफिसर सचिन जाधव, विनायक फाळके, आशपाक आजरेकर आदी उपस्थित होते.
