कोल्हापूर ; चंद्रशेखर माताडे : तिकीट घेता का तिकीट, अशी विचारण्याची ज्या पक्षाची एकेकाळी वेळ होती, त्याच पक्षात आता तिकिटासाठी ईर्ष्या पणाला लागली आहे. कोल्हापूर उत्तर विधानसभा पोटनिवडणुकीत भाजपकडून इच्छुकांची मोर्चेबांधणी सुरू आहे. महेश जाधव, सत्यजित कदम आणि माणिक पाटील-चुयेकर यांनी नेत्यांकडे उमेदवारीसाठी आग्रह धरला आहे.
भाजपची कोल्हापुरात अत्यंत मर्यादित ताकद होती. तेव्हा नगरसेवक सुभाष वोरा यांनी विधानसभा आणि लोकसभा या दोन्ही निवडणुका लढविल्या होत्या. उमेदवारी घेण्यासाठी कार्यकर्ते नव्हते, अशी या पक्षाची स्थिती होती. मात्र, नंतरच्या काळात भाजपच्या नेत्यांनी विशेषतः गोपीनाथ मुंडे यांनी कोल्हापुरातील कार्यकर्त्यांचा संच बांधला. नितीन गडकरी यांनी कार्यकर्त्यांना चांगली साथ दिली. प्रकाश जावडेकर, पंकजा मुंडे या तत्कालीन भारतीय जनता युवा मोर्चाच्या नेत्यांनी जमेल तेवढे युवकांचे संघटन केले आणि आज या पक्षाकडे तिकीट मागण्यासाठी चुरस लागली आहे.
भाजपचा उमेदवार या निवडणुकीत असणार हे स्पष्ट आहे. या निवडणुकीत भाजपकडून पक्षाचे माजी जिल्हाध्यक्ष महेश जाधव, माजी नगरसेवक सत्यजित कदम, माणिक पाटील-चुयेकर यांनी उमेदवारीसाठी आपला दावा केला आहे.
महेश जाधव यांनी 2014 ची विधानसभा निवडणूक याच मतदारसंघातून भाजपकडून लढविली होती. सत्यजित कदम यांनी हीच निवडणूक काँग्रेसकडून लढविली होती. 2014 च्या या निवडणुकीत शिवसेनेचे राजेश क्षीरसागर विजयी झाले होते. मात्र, 2019 मध्ये काँग्रेसच्या चंद्रकांत जाधव यांनी शिवसेनेचे क्षीरसागर यांचा पराभव केला. क्षीरसागर यांनी 2009 व 2014 असे या मतदारसंघाचे प्रतिनिधित्व केले होते.
आता भाजपकडून तीन उमेदवार इच्छुक आहेत. भाजपचे नेतेही निवडणुकीसाठी यश देणार्या चेहर्याच्या शोधात आहेत. नांदेड जिल्ह्यातील देगलूर बिलोली विधानसभा मतदारसंघाच्या पोटनिवडणुकीत भाजपकडे तगडा उमेदवार नसल्यामुळे शिवसेनेचे त्या मतदारसंघातील पराभूत उमेदवार सुभाष साबणे यांना भाजपने शिवसेनेतून आयात करून उमेदवारी दिली. त्या मागे पंढरपूर पोटनिवडणुकीतील विजयाचा संदर्भ होता.
पंढरपूरचे राष्ट्रवादीचे आमदार भारत भालके यांचे अकाली निधन झाले. महाविकास आघाडी सरकार सत्तेवर आल्यानंतर राज्यातील ही पहिली पोटनिवडणूक झाली. या निवडणुकीत भालके यांचे चिरंजीव भगीरथ भालके यांना पराभूत करून भाजपचे समाधान अवताडे विजयी झाले. मात्र, देगलूर बिलोली मतदारसंघात काँग्रेसचे जितेश अंतापूरकर विजयी झाले. भाजप उमेदवारीची माळ कोणाच्या गळ्यात पडणार, याची चर्चा आहे.
'महाविकास'ला जिल्ह्यात तडा
काँग्रेसचे आ. चंद्रकांत जाधव यांच्या अकाली निधनामुळे कोल्हापूर उत्तर विधानसभा मतदारसंघाची पोटनिवडणूक होऊ घातली आहे. काँग्रेस आमदारांचे निधन झाल्यामुळे काँग्रेस या जागेवर लढणार हे स्पष्ट आहे. त्यांनी दिवंगत चंद्रकांत जाधव यांच्या पत्नी जयश्री जाधव यांना उमेदवारी देण्याचे ठरविले आहे. काँग्रेस-राष्ट्रवादी आणि शिवसेना अशी महाविकास आघाडी राज्यात सत्तेवर असली तरी जिल्ह्यात या आघाडीला तडा गेला आहे. जिल्हा मध्यवर्ती बँकेच्या निवडणुकीतून ते स्पष्ट झाले आहे. शिवसेनेने कोल्हापूर उत्तरची पोटनिवडणूक लढविण्याचे ठरविले आहे. त्यांना 'मातोश्री'च्या निर्णयाची प्रतीक्षा आहे.
