पुढारी ऑनलाईन डेस्क : Zomato Share Price : फूड डिलिव्हरी सेवा पुरवणारी कंपनी असलेल्या झोमॅटोने या वर्षाच्या पहिल्या तिमाहीत प्रथमच नफा नोंद केला आहे. त्यामुळे शेअर बाजारात शुक्रवारी झोमॅटोच्या शेअरचा दर १२ टक्क्यांनी वधारला.
गुरुवारी झोमॅटोचा शेअर (Zomato Share Price) ८६.२२ रुपयांना बंद झाला होता. तर शुक्रवारी सकाळी हा शेअर ८९ रुपयांना ओपन झाला. त्यानंतर हा शेअर ९८.३९ रुपयांवर पोहोचला होता. यात नंतर किरकोळ घसरण होऊन हा शेअर ९६.२३ रुपयांवर आला होता.
गुरुवारी झोमॅटोने या वर्षातील पहिला तिमाही अहवाल जाहीर केला. यात कंपनीला निव्वळ नफा २ कोटी रुपये असल्याचे जाहीर करण्यात आले आहे. तर YOY (Year on Year) तोटा १८६ कोटी रुपये दाखवण्यात आला आहे. तर गतवर्षीच्या १४१४ कोटी रुपये महसुलाच्या तुलनेत कंपनीचा महसुल २४१६ कोटी रुपये झालेला आहे.
जुलै २०२१ला झोमॅटोचा शेअर बाजारावर (Zomato Share Price) नोंदली गेली. इश्यु प्राईस ७६ रुपये असताना कंपनीचा शेअर ११५ रुपयांवर नोंद झाला. पण त्यानंतर लिस्टिंग प्राईसपेक्षा हा शेअर नेहमी खालच्या किंमतीवरच राहिला.
