लंडन : तुम्ही कधी अशा मांजराबद्दल ऐकले आहे का, ज्याच्याकडे कोट्यवधींची संपत्ती आहे आणि ज्याला जगभर लाखो लोक फॉलो करतात? ऐकण्यास जरी हे विचित्र वाटले तरी हे पूर्णपणे खरे आहे. आम्ही बोलत आहोत ‘नाला कॅट’ बद्दल. ही केवळ एक पाळीव मांजर नाही, तर सोशल मीडियाच्या जगात एक मोठे नाव आणि ग्लोबल ब्रँड बनली आहे. नालाच्या लोकप्रियतेचा अंदाज यावरून येतो की इन्स्टाग्रामवर तिचे ४२ लाखांहून अधिक फॉलोअर्स आहेत आणि तिचे नाव गिनिज वर्ल्ड रेकॉर्डमध्येही नोंदवले आहे.
नालाची कहाणी आज जितकी खास आहे, तितकीच तिची सुरुवात साधी होती. २०१० साली जेव्हा नाला फक्त पाच महिन्यांची होती, तेव्हा तिच्या मालक वारिसिरी मेथाचिट्टीफन यांनी कॅलिफोर्नियातील एका ॲनिमल शेल्टरहून तिला दत्तक घेतले होते. त्यावेळी कदाचित कोणालाही वाटले नसेल की, शेल्टर होममध्ये राहणारी ही छोटीशी मांजर पुढे जाऊन जगातील सर्वात प्रसिद्ध मांजरांपैकी एक बनेल. नालाला नवीन घर तर मिळालेच; शिवाय तिच्या आयुष्याने असे वळण घेतले की, ती इंटरनेट स्टार बनली. २०१२ साली नालाच्या मालकाने तिच्या रोजच्या क्षणांना लोकांसोबत शेअर करण्यासाठी इन्स्टाग्राम अकाऊंट तयार केले. सुरुवातीला याचा उद्देश फक्त नालाचे फोटो आणि व्हिडीओ शेअर करणे हा होता. पण हळूहळू लोकांना तिचे फोटो आणि निरागस हालचाली आवडू लागल्या. तिचा गोलमटोल चेहरा, निळे डोळे आणि गोड स्वभाव सोशल मीडिया यूजर्सना इतका आवडला की, तिचा फॅन बेस सातत्याने वाढत गेला. बघता बघता नाला सोशल मीडियाच्या जगातील मोठी स्टार बनली.
आज नालाच्या इन्स्टाग्राम अकाऊंटवर ४.२ मिलियन म्हणजे ४२ लाखांहून अधिक फॉलोअर्स आहेत. तिची लोकप्रियता इतकी वाढली की, गिनिज वर्ल्ड रेकॉर्डमध्ये तिचे नाव इन्स्टाग्रामवर सर्वाधिक फॉलो केली जाणारी मांजर म्हणून नोंदवले गेले. म्हणजे ज्या मांजराचे फोटो कधीकाळी फक्त तिच्या मालकासाठी आठवणी होते, तेच फोटो पुढे जाऊन लाखो लोकांच्या मनोरंजनाचा भाग बनले. नालाची लोकप्रियता फक्त फॉलोअर्सपुरती मर्यादित राहिली नाही. तिच्या सोशल मीडिया ओळखीने एका मोठ्या व्यवसायाला जन्म दिला. काही अंदाजानुसार नालाची एकूण संपत्ती सुमारे १०० मिलियन डॉलर म्हणजे अंदाजे ८३९ कोटी रुपये इतकी आहे. इतकी मोठी रक्कम ऐकून प्रश्न पडतो की, एका मांजराच्या नावावर इतकी संपत्ती कशी असू शकते? याचे उत्तर नालाच्या सोशल मीडिया लोकप्रियतेत आणि त्यातून निर्माण झालेल्या व्यवसायात दडले आहे.
