नवी दिल्ली : दात हा आपल्या शरीराचा एक अत्यंत महत्त्वाचा भाग आहे, जो अन्न चावून खाण्यास मदत करतो, ज्यामुळे अन्न पोटात सहज पचते. तसेच दात आपल्या हास्यालाही आकर्षक बनवतात. पण तुम्हाला माहीत आहे का की, हे दात तोंडाव्यतिरिक्त इतर ठिकाणीही येऊ शकतात? नुकताच असाच एक अत्यंत विचित्र प्रकार समोर आला आहे, जो पाहून डॉक्टरही चक्रावले आहेत. सर्वात विशेष बाब म्हणजे हे प्रकरण भारतातीलच असून, त्याची नोंद ‘अमेरिकन अकॅडमी ऑफ ऑप्थाल्मोलॉजी’ (AAO) मध्ये झाली आहे. या अजब प्रकरणात एका किशोराच्या डोळ्याच्या वर दोन टोकदार दात आले होते.
‘NCBI’च्या अहवालानुसार, तोंडातील ठरलेल्या जागेव्यतिरिक्त दुसऱ्या कोणत्याही ठिकाणी दात येण्याच्या या स्थितीला ‘एक्टोपिक टूथ इरप्शन’ (Ectopic Tooth Eruption) असे म्हणतात. ‘न्यूयॉर्क पोस्ट’च्या अहवालानुसार, एका १६ वर्षीय भारतीय किशोराचे दोन दात पापणी आणि भुवयांच्या मधल्या असामान्य जागेवर आले होते. डॉक्टरांनी या केसला जगातील सर्वात अनोखी वैद्यकीय घटना मानले आहे. असामान्य ठिकाणी दात येण्याच्या घटना यापूर्वीही समोर आल्या आहेत. AAO च्या अहवालानुसार, वैद्यकीय इतिहासात नाकाची पोकळी, डोळ्यांच्या खाली, नाकपुड्यांच्या आत आणि गालच्या हाडांच्या आतील भागात दात आल्याचे नोंदवले गेले आहे. परंतु, डोळ्याच्या वरच्या भागात दात येण्याचे असे प्रकरण यापूर्वी कधीही पाहिले किंवा ऐकले गेले नव्हते.
या अभ्यासाच्या सह-लेखिका डॉ. मेघना तंवर यांच्या मते, या प्रकरणात दात ‘सुपीरियर ऑर्बिट’मध्ये उपस्थित होते, जे डोळ्याच्या वरच्या खोबणीत असते. अहवालानुसार, त्या किशोराला सुरुवातीला काही महिने पापणीच्या वरच्या भागात कोणतीही वेदना न होता सूज आली होती. त्यानंतर दोन टोकदार पांढऱ्या वस्तू बाहेर येताना दिसू लागल्या. काही वेळातच पापणी आणि भुवयांच्या मधोमध दोन पूर्ण टोकदार दात बाहेर आले. डॉक्टरांना सुरुवातीला हा एक दुर्मीळ ‘टेराटोमा ट्यूमर’ वाटला, जो हाडे आणि दातांच्या पेशींवर परिणाम करतो. परंतु, नंतर सीटी (CT) स्कॅन केल्यानंतर तिथे पूर्ण विकसित ‘कॅनाइन टूथ’ (टोकदार दात) असल्याची पुष्टी झाली. अहवालानुसार, डॉक्टरांनी शस्त्रक्रिया (Surgery) करून पापणीच्या वरचे हे दात यशस्वीरित्या काढून टाकले आहेत आणि तपासणीनुसार, आता तिथे इतर कोणतेही ‘एक्टोपिक टीथ’ असण्याची शक्यता नाही.
